Ngoenzneix, daxmeh bae guhhong seiz, daengq gou dawz vanj swiq seuq bae. Gou soqlaiz cij rox gaem vanj gwn ngaiz, caengz swiq vanj gvaq, baenzlawz cij swiq ndaej seuq ne? Gou yawj gij vanj uq haenx, mbouj rox baenzlawz guh. Dahcej raen gou naj saepsetset, aenbak de dep henz rwz gou naeuz:“Mbouj yungh you, mbouj rox gou son mwngz.” Gou dingq gij vah dahcej le, sim ngeix:Ndaej! Gou itdingh dawz vanj swiq seuq bae.

Gou daek bat raemx ndeu daeuj, dawz vanj cuengq roengz ndaw bat bae swiq . Byawz rox baenzlawz hix swiq mbouj seuq, lumh hwnjbae cungj dwg niunetnet. Dahcej naeuz:“Gaej beg sai rengz lo, raemxgyoet dwg swiq mbouj seuq bw, aeu raemxndat daeuj swiq cij ndaej.”

Gou ciuq gij vah dahceh vuenh bat raemxndat he. Hainduj, gou cij aeu baengz- swiqvanj youq ndaw vanj cienq song gien couh laihnaeuz swiq seuq lo. Dahcej lumh le naeuz:“Mbouj ndaej, lij miz youz, aeu yungh rengz swiq.”

Gou mbe bak nam naeuz:“Yienghneix nyinhcaen guh gij- maz, lujlaj di couh ndaej lo, swiq ndaej caiq seuq, daengz haemh gwn caeuz lij yungh ne!” Dahcej swiq aen he hawj gou yawj, gou ciuq gij yiengh dahcej bae guh, aenvanj caen swiq seuq lo, mbouj yaep he, gou couh dawz vanj swiq sat lo.

Gou yawj gij vanj swhgeij swiq haenx, aen’aen cungj seuq- saksak wenjmyagmyag, ngeix mbouj daengz swiq vanj hix aeu miz banhfap ndei cij swiq ndaej seuq bw.

(指导老师：陆雪燕)