Miz ngoenz singhgiz roek ndeu gyanghaet, gwnzmbwn doek fwn gig hung, rumz ci dwk ngafaex ngauz bae ngauz dauq.

Doekfwn gvaq le, gou couh bae laj gorungz, yawjyawj miz mbouj miz roegiq doek roengzdaeuj. Gou yawjraen miz haujlai rongzroeg doek youq gwnz dieg, gou couh baenz aen baenz aen rongzroeg bae ra roegiq. Gou ra ndaej roek duz roeglwg, gij fwed roeglwg cungj dumz liux. Gou dawz roeglwg daiq ma ranz, aeu cuihfunghgih boq hawq gij bwn roeglwg, yienzhaeuh aeu ceij daeuj guh aen rongz hawj roeglwg, youq laj rongzceij bu di ceij unqnupnup he. Gou dawz roeglwg cuengq haeuj ndaw rongzceij bae le, gou couh aeu boiiq cang raemx caeuq ngaiz daeuj gueng roeglwg. Moix ngoenz cuengqhag dauqma, gou cungj bae gaeb daek gaeb non ma gueng roeglwg. Gij roeglwg moix baez raen gou dauqma seiz, cungj cici caca heuh mbouj dingz, lumjbaenz doiq gou gangj:“Docih mwngz, bouxcawj iq!”

Gvaq buenq ndwen le, roeglwg maj fwed lo, rox mbin lo. Gou dawz gyoengqde cuengq okbae, yawjraen roeglwg bek fwed angq heuh mbin bae giz gyae, gou ndawsim gig angq, hoeng, youh miz di sij mbouj ndaej. “Roeglwg, caiqraen lo!”

（指导老师：朱卫明）