Seizhah mbwn ndatoem youh dumzmbaeq, caiq gyahwnj ndang vunz sup haeuj caeuq baiz ok haemq hoengh dem, ndang sied rengz lai, haujlai vunz cungj gamjdaengz ndang unq rengz naiq、mbouj siengj gwn doxgaiq, lai gwn di gijgwn nyinhbouj he, ndaej ik heiq ciengx yaem、demgiengz rengzndang.

Seizhah nyinhbouj caeuq seizdoeng nyinhbouj mbouj dox- doengz, itdingh gwn cit di, mbouj ndaej gwn youznywnx lai, mboujnex couh yungzheih sieng dungx. Cunghyih nyinhnaeuz, maenzcienz caeuq makdaihcauj ndaej cangq dungx ik heiq, hab boux dungx hawnyieg seizhah cawj cuk gwn, caiq gangj, song cungj huq neix cungj miz gij cozyung daezsang menjyizliz aenndang. Dangzrwi、cijvaiz、ngaeux、raet- ngaenz、gienghduh、beghab gawq ndaej ik heiq ciengx yaem, youh ndaej ciengx dungx seng raemx, dwg gijgwn ndei boux ndang nyieg bingh lai、boux ok hanh haemq lai、boux mbouj siengj gwn doxgaiq seizhah gwn haenx.

Seizhah gwn noh wng gwn nohgaeq、nohbit、nohmou cing、noh roegdoxgap haemq ndei. Ndawde, nohbit mboujdanh hamz danbwzciz lai, caemhcaiq dwg aenvih de dwg doihduz ndaw raemx, gwn de ndaej nyinh yaem ciengx dungx、cangq dungx bouj haw、leih caep. Nohbit ceiq ndei dwg aeuq gwn, hix ndaej dwk ngaeux、lwgfaeg roengz itheij aeuq dang gwn.