Lingzlwg caeuq malwg youq ranz bouxcawj. Ngoenz he, yawjraen laeq lwgnyez ranznden gwn maknim, songde myaiz cungj rwi lo, siengj bae gwnz ndoi gwn maknim. Hoeng, bouxcawj gam ndaej gig yiemz, songde mbouj miz fap okbae.

Seizgan gig vaiq couh daengz caetnyied cibseiq, ranzranz hek bae hek dauq, bouxcawj nyaengq gvaq ciet, mbouj ndaejhoengq guenj gyoengqde lo.

Malwg iu lingzlwg naeuz: “Raeuz bae gwnz ndoi gwn maknim ba. ”

Lingzlwg naeuz:“Dingq boux- cawj gangj caetnyied cibseiq dwg ngoenzciet duzfangz, de gaenq daengq lwgnyez gaej ok rog bae guhcaemz ne.”

Malwg naeuz:“Gaej laudai lai, gijneix dwg yaeuh vunz, gaenbonj mbouj miz fangz. Gaej lau, miz gou ne!”

Lingzlwg siengj daengz ngoenz- naengz malwg lienz bouxcaeg hix gamj haeb, couh dapwngq lo.

Daengngoenz ndongqmyanmyan, ndit haenq mbwn oemq. Songde ok mbanj, haeuj lueg, mbouj geij nanz couh daengz ndoi maknim lo.

Baez raen maknim, songde couh angqvauvau buet gvaqbae.

Lingzlwg naeuz:“Daeggo, aenheu aenhoengz caengz baenz, mbouj ndei gwn, aeu gwn aenndaem, lij aeu haeujsim gaej gwn deng aennaeuh. ”

Malwg mbaet aen maknim ndaemndwtndwt bongzbebe daeuj mbik hai baez yawj:“Aeya, aen neix yawj hwnjbae baenzneix ndei, ndawde vihmaz miz non ha?” Lingzlwg gvaq- bae baez yawj, riu lo: “Haha! Aen maknim neix ndei raixcaix, gijneix mbouj dwg non, dwg sim mak!” Malwg sikhaek dawz maknim oet haeuj bak bae gwn. Ha, vansubsub, homfwtfwt.

Seiqlengq caemrwgrwg, cingx- ngaungau.

Sawqmwh, lingzlwg raen gwnz maknim miz riz lumj ribfwngz vunz nei, couh heuh malwg gvaqdaeuj yawj. Malwg gvaqdaeuj baez yawj, caen dahraix, gwnz maknim miz riz lumj yaenq ribfwngz vunz nei! Malwg naeuz: “Gij riz neix, haengjdingh dwg gij riz ribfwngz vunz daeuj gonq haenx. Seizgonq maknim caengz ndaej gwn, gyoengqde mbaengq sieng maknim le louz roengzdaeuj.”

Yaep ndeu, lingzlwg youh hemq malwg gvaqbae. Yienzlaiz, haujlai maknim cungj miz riz ribfwngz roxnaeuz dek lo! Malwg naeuz:“Miz maz geizgvaiq? Gijneix cungj dwg bouxvunz mbaenq gvaq nyaenj gvaq!” Lingzlwg naeuz:“Bouxlawz baenzlai ndaejhoenggq, cienmonz daeuj mbaengq baenzlai maknim!” Malwg naeuz:“Mbouj dwg vunz dwg duzlawz……” Caengz gangj sat, song- de fwt singj lo, doengzcaez saetsing hemq hwnjdaeuj: “Duzfangz!” Swenj dwk bulu buet roengz ndoi.

Songde buet ha buet, roengz ndoi, gvaq lueg, cigdaengz yawjraen aenmbanj cij menh roengzdaeuj.

Songde baegfofo, youq gyaeuj- mbanj yietnaiq. Seizneix, miz geij laeq lwgnyez yaek hwnj ndoi bae ra maknim. Naih buz ndeu fok naeuz: “Seizneix gwnz ndoi mbouj miz saek vunz, duzfangz baenz lai baenz daih, sou couh bae lo!” Fok gvaq le, youh hozraez naeuz:“Seizneix fangz iek youq gwnz ndoi gwn maknim, vih mbouj hawj vunz ceng gwn maknim, duzfangz dawz maknim cug cungj mbaengq gvaq nyaenj gvaq lo, vunz gwn le couh deng baenzbingh bw.” Lingzlwg caeuq malwg dingq le, aensim youh diuqbubbub hwnjdaeuj, lau swhgeij baenzbingh.

Seizneix, boux daxgoeng ndeu byaij gvaq dingqnyi le, riu naeuz: “Buzsam ha, mwngz mbouj hawj lwgnyez hwnj ndoi gig deng, seizneix fwn raemx lai, hwnj ndoi lau deng raemxrongz roxnaeuz byad doek roengz ndoi. Hoeng, mwngz hix mbouj yungh yaeuh lwgnyez miz gijmaz fangzgvaiq ha. Lajmbwn mbouj miz fangzgvaiq, gij maknim dwg cug le youh sup gij raemxfwn, couh gag dek miz riz roxnaeuz dek vaih, ciepdwk couh naeuh lo, loenq roengz namh lo.”

Yienzlai gij riz ribfwngz dwg riz dek! Lingzlwg caeuq malwg soeng gaemz heiq ndeu lo.

(Ganh Sozvwnz/甘说文)