Daxbuz gou ciengx miz haujlai gaeq, miz gaeqboux gaeqlwg gaeqhangh, hoeng ceiq yinx gou louzsim dwg duz gaeqmeh geq. Duz gaeqmeh geq ranz gou, baenz ngoenz cungj ngiengxgyaeuj enjaek byaijngoetngoet, lumjbaenz hawj vunz rox de dwg ndaw gyoengq gaeq ceiq geq nei, moix duzgaeq cungj aeu dingq de cij ndaej, mboujne saedceij couh mbouj ndei gvaq.

Geiq ndaej miz baez ndeu, daxbuz mbouj youq ranz, gou bae gueng gaeq, hoeng mbouj raen duz gaeqmeh geq, gou couh dauqcawq bae ra, laxlawz de ndoj youq ndaw gungx he, aen roujgaeq hoengzfwdfwd dwk ndwn youq gizhaenx singsang ciengqgo, gou yawjraen laj caekhaex de miz aen laengzgyaeq ndeu. Dai lo, de youh daeujdaengz aen laengzgyaeq bouxwnq okgyaeq lo. Yaephe, duz gaeqmeh byaij daengz henz gyoengq gaeq wnq bae, gij gaeq haenx couh sikhaek lumj bouxlajfwngz nei, bienq hai hawj de gwn haeux lo.

Gangjdaengz gaeqmeh ceiq gyaez gyaeqlwg wnggai dwg duz gaeqmeh geq ranz gou lo. Miz baez ndeu, gij gaeq youq henz ranz guhcaemz ra doxgaiq gwn, sawqmwh miz duz ma’iq ndeu, cunghuhu haeuj ndaw gyoengq gaeq bae, hwk dwk gyoengq gaeqlwg dauqcawq luenh buet, duz gaeqmeh raen le, lienzmuengz cung youq baihnaj daihsing hwk duz ma’iq haenx, doeklaeng gyoengq gaeq hix daeuj bang de. Duq ma’iq raen gij gaeq haenx mbouj lau cix doxgiet hwnjdaeuj caeuq de hoenx, lau dwk baetrieng buet deuz lo.

Neix couhdwg duz gaeqmeh geq ranz gou, mwngz naeuz de dwg mbouj dwg gig dwggyaez ne?

(指导老师：陆冬群)