Veiz Gozcingh gyaez gangj saedyauq, gig nyap hingzsikcujyi. Bi 1971 ndaemcin seiz, de lingx geij boux lajfwngz seizbienh naengh aen ci, loh gvaq Yunghningz Vuzhih, swnhbienh haeuj ranzbanhgoeng dangjveij gunghse bae yawjyawj, gyoengq goengdaeuz gunghse cungj roengz mbanj bae lo, gag lw boux misuh mbouj bae, de mboujdingh dwk dienhvah hawj dadui. Veiz Gozcingh cam: “Mwngz cam dadui aeu gijmaz cingzgvang?”

Boux misuh neix naeuz:“Aeu cindu ndaem gyaj.”

“Geij ngoenz aeu baez?”

“Ngoenzngoenz cungj aeu, aenvih ndaw yienh ngoenznaengz cungj aeu dou bauq hawj gyoengqde.”

“Gunghse sou miz geijlai aen dadui?”

“Bet aen.”

“Gak aen dadui bauq soq hwnjdaeuj haenx caen lwi?”

“Nanz gangj bw, mbangj aen dadui miz cibgeij ngeihcib aen swnghcanjdui, byaij baenzngoenz cungj mbouj liux, yienghneix cix daihdaej gujsuenq lo. Mbangj dadui lau gunghse bihbingz guh ndaej numq lai, cix bauqgyaj.”

Boux misuh doeklaeng rox, boux caeuq de gangjvah neix dwg boux goengdaeuz swcigih, couh lauxsaed naeuz de:“Ngoenzngoenz aeu cindu, gizsaed couhdwg hingzsikcujyi, baih- gwnz heuh dou yienghneix guh, dou hix mbouj miz banhfap, fanjcingq dwg it gaep lox it gaep cixbah lo!”

Veiz Gozcingh daj Vuzhih dauqma le, sikhaek heuh vunz raiz doengcei, mboujcinj caiq guh cungj hingzsikcujyi neix.

Supaeu aen gyauyin “rumz gangjboq” mwh daih hamjyat haenx, Veiz Gozcingh doiq binaengz souhaeuj haeuxgwn, cungj giengzdiuh aeu louz miz diegyawz. Baez ndeu, youq baez hoih swcigih dangjveij cangzveij doxyaeng nungzyez vwndiz gwnzde, miz vunz cab vah naeuz, moux yienh daegdaengq daezsang gij lwdvuenh- suenq haeuxyiengz aen, gyaj bauq canjliengh, vunzlai yigen gig lai. Veiz Gozcingh dingq le gig hozndat, yunghrengz bek aen eijgaeu de naengh haenx naeuz: “Yienghneix mbouj dwg ngaek lauxbeksingq ha, yaek aeu baij vunz roengzbae diucaz, danghnaeuz dwg caen, aeu yiemzsuk bihbingz. Aen vwndiz neix raeuz gaenq miz gyauyin gvaq lo, caemhcaiq miz gingniemh lo, gaej caiq yungh aen fuengfap ‘cejdaihbauq’ neix daeuj yaeuh swcigih dangjveij lo.” Ginggvaq sam baez baij gunghcozcuj roengzbae doiqcingq, ceiq doeklaeng caz ok soqgyaj miz geij cien fanh gaen. Bi 1972 seizdoeng, swcigih dungjgi bumwnz fanjyingj hawj de, mbangj dieg aeu swnghcanjdui dauqcungz “haedsuenq canjliengh”. De sikhaek cijsi lwnh gij goengdaeuz gak dieg、si、yienh nyi: Haeux miz geijlai dwg geijlai, gaej luenh yungh yiengh hingzsik wnq daeuj gauj fanj muenz canjliengh muenz seifaen, gaej heuh swnghcanjdui “caiq dauqcungz haed- suenq canjliengh”. Gaxgonq guj lai le cinj de doiq roengzdaeuj, ciuq saehsaed bae guh, dem couhdwg dem, gemj couhdwg gemj. Youq mbangj haihoih caeuq saek baez doxyaeng ndawde, de cungj dwg sim’unq naihsim daengq gyoengq boux ganbu naeuz, doiq haeuxgwn, uk itdingh aeu lingzsingj, louz miz diegyawz, ciengeiz gaej dauqcungz famh gij loekloeng “cej daihbauq” haenx.

(caengz sat)