Boux vunz simndei, sim de gag bingz- cingh cwxcaih; boux vunz simndei, itbuen aek gvangq rox laex caemhcaiq miz caijsoq ndei daeuj gaen de, gizgiz bungz vunzgviq, yienghyiengh miz vunz bang; boux vunz simndei, lai guh saehndei, gwnzbiengz miz vuedlig, lajbiengz miz vunz haenh ndei.

Aen siengjfap ndei miz nwngzliengh cingq, guh saeh hwnjdaeuj couh rox coi swhgeij guh ndaej engq ndei, hix rox daiqdoengh vunz seiqhenz coh giz ndei bae fazcanj.

Boux vunz simndei, doiq bohmeh caeuq lwg caemh ndei, doiq vunzcaen、baengzyoux hix ndei, doiq vunzseng hix ityiengh ndei. Cijaeu bouxboux cungj simndei, gwnzbiengz couh itdingh gizgiz gyaeundei.

Boux vunz simndei ndaw dungx gag miz simgyaez rimrwd, ciengzseiz gag rox bang bouxwnq siengj vwndiz, rox gvansim bouxwnq hojnanz, rox sim’in gij saetbaih bouxwnq, rox iet fwngz bang bouxwnq guh saeh. Gyoengqde dwg aen cizdij miz rim gyaez ndeu, mbouj dwg gak boux gag guh, de gvansim bouxwnq lai gvaq gvansim swhgeij.

Vunz simsienh, guh saehndei, mbouj dwg naeuz itdingh gingdoengh diendeih, saekseiz dwg boux ndeu roxnaeuz baenz gyoengq laeglemx guh saehndei mbouj louz mingz. Gouq lwgnyez doek raemx dwg guh saehsienh, bang bouxlaux gannanz dwg guh saehsienh, hawj ngaenz bang baenz cien baenz fanh bouxndoq hix dwg guh saehsienh, ndaep feiz coemh bya dwg guh saehsienh, yw bouxvunz najseng hix dwg guh saehsienh.

Guh bouxvunz simndei di ba, seiz mwngz gwn imq le gaej lumz gij vunz lij dungx iek haenx, mwngz ancienz lo, danhseih lij miz vunz bungz daengz yungyiemj, mwngz bingh ndei lo gaej lumz lij miz vunzbingh wnq, vaiq iet ok cik fwngz raeuj caeuq huzndei mwngz, bang gyoengqde, hawj gyoengqde lizgyae indot, caeuq mwngz doengzcaez byaij, yamq bae coh gyaundei ngoenzcog.