Makmoiz ranzcoj gangj henj couh henj lo

Ndik fwn manzgaengq

Dap hwnj benq fwj mbaeumbiengq bae

Youq gyangmbwn doek roengzdaeuj

Couh lumj fiz youq ndaw mumjgyumq ndaw hoenz

Caet nyied lajmbanj

Diegnamh dumznyinh

Go’gyaj youq ndaw rumz riunyumj

Duzgoep maeuq youq gwnz mbawngaeux

Raemxfwn lumj danz bizbaz

Gyonj baenz hot habciengq gig hung ndeu

Yienghneix dwg doiq seizhah ceiq ndei biujdaz

Yahdaiq gou duk din dwk

De baet seuq gyanghongh mwnq dieg ndeu

Youq ndaw fwn’oemq dak buhvaq

Dawz aensim de yo ce haujlai nanz

Youh daengz seizciet fwn’oemq

Simcingz dumzcatcat

Seizciet doxlwnz baebae dauqdauq

Gou mbouj bienq dwk ciengxlwenx gyaez ranzcoj

caemhcaiq dauqngeix

Ndwenngoenz lumj makmoiz cug daeuq

Raemx lai youh soemj youh diemz