Youq ndaw ban gyoengq doengzhag cungj rox gou caeuq Siujmingz dwg baengzyoux ndei. Siujmingz boux vunz youh hung youh sang, aennaj gig ndeiyawj, baenz ngoenz cungj dwg riunyumj, caeuq de youq itheij, cungj mbouj miz gijmaz saeh simfanz.

Song boux dou baenz baengzyoux ndei, dwg daj gienh saeh he yinxhwnj. Haenx dwg bi gonq seizhah, miz ngoenz ndeu, gou youq ndaw gyausiz fwngz gaem fag mid iq he, luenh vad bae vad dauq hawj doengzhag yawj, cingq youq seizhaenx, Siujmingz daj henz ndang gou byaij gvaq, mid iq bungq deng fwngz de lo, gij lwed sikhaek lae okdaeuj. Gou simvueng lo, sikhaek rag de bae hawj canghyw yawj. Doeklaeng banhcujyin hix ganj daengz yihyen, lauxsae itmienh cam Siujmingz in mbouj in, itmienh ngeng gyaeuj daeuj bihbingz gou. Youq seizhaenx, Siujmingz mbouj goq fwngz in, doiq lauxsae gangj:“Mbouj youq- gaenj, de mbouj dwg daegdaengq vad deng gou ne.” Gou laihnaeuz fwngz Siujmingz deng sieng, de itdingh gvaiq gou lo, siengj mbouj daengz youq baihnaj lauxsae de gingqyienz bang gou gangj vahndei, gou ndawsim gig mboujgvaqeiq. Ngoenz daihngeih gou daiq geij bonj saw bae ranz Siujmingz, de ngeng ndang naengh youq henz congz, naj riunyumj caeuq gou gangj vah, di ndeu hix mbouj gvaiq gou. Daj seizhaenx hwnj, gou caeuq Siujmingz couh baenz baengzyoux ndei lo.

Siujmingz gig coengmingz, hagsib hix gig nyinhcaen, youh gig haengj doengh uk, youq ndaw ban cingzcik itcig gig ndei. De lij dwg ban ganbu. Siujmingz gig maij bang vunz, miz baez ndeu, gou caeuq Siujmingz bae sanghcangz cawx doxgaiq, youq bakdou yawjraen miz boux lwgnyez he cingq singhung daej, dou byaij gvaqbae cam de vihmaz daej, lwgnyez raen dou dwg vunzseng, daej ndaej engq singhung lo. Youq seizhaenx, Siujmingz couh siengj banhfat daeuj daeuq lwgnyez, hawj boux lwgnyez mbouj daej lo. Doeklaeng gou caeuq Siujmingz bang boux lwgnyez ra raen daxmeh de lo.

Baengzyoux ndei gou Siujmingz dwg boux vunz swnhsienh simndei ndeu, ngoenz he yawj mbouj raen de, gou couh siengniemh de.