Daj iq daengz hung, gij gyaez daxmeh hawj gou haenx gig lai gig lai, lumj gij ndaundeiq gwnzmbwn geq hix geq mbouj liux.

Geiq ndaej miz haemh ndeu, gou mbouj ndeiyouq, couh bae ninz lo, daengz cib diemj cung, daxmeh guh hong sat le daeuj yawj gou, fatyienh gou nohndat lo, ndawsim gig gip, seizhaenx, cingq dwg seizdoeng, gij rumz youq rog ranz huhu ci dwk, lumj duzguk rongx nei dwglau. Hoeng daxmeh mbouj goq baenz lai, aemq gou couh buet bae veiswnghsiz ndaw mbanj ra canghyw. Daengz veiswnghsiz, yienznaeuz seiz- haenx mbwn gig nit, hoeng gou yawjraen gwnz najbyak daxmeh cungj miz hanh lo. Seizhaenx, gou gamjdaengz gij gyaez daxmeh gig raeujrub, roxnyinh bingh gou ndei haujlai lo.

Gou dwg daxmeh boux dog daiq hung, aenvih daxboh gou youq ndaw budui guhhong, binaengz cij ndaej ma baez ndeu, caemhcaiq seizgan mbouj nanz, baedauq cijmiz ndwen ndeu, daxboh gaenbonj bang mbouj ndaej daxmeh saek di.

Gij gyaez daxmeh dwg gij bauj fouzgyaq, dwg aeu gijmaz doenghyiengh cungj vuenh mbouj ndaej, gij gyaez daxmeh lumj doiq fwngz yawj mbouj raen, lumh mbouj daengz nei, raeujrub dwk lumh aenndang gou. Gij gyaez daxmeh lumj aen- liengj, mboujlwnh bongjrumz roxnaeuz doekfwn, cungj bang gou dangj dwk, hawj gou engq ndei byaij baenaj.

Daxmeh, gou docih mwngz, docih mwngz gvansim gou, docih mwngz ndiepgyaez gou, hawj gou ndeindei hagsib, angqyangz majhung. Daxmeh, gou itdingh mbouj hawj mwngz saetmuengh, itdingh aeu hawj mwngz vih miz gou daeglwg neix gamjdaengz miznaj.

（指导老师：韦凤玲）