Ngoenzneix dwg ngoenz singhgiz, daxboh daxmeh cungj bae gyaban lo, gou boux dog youq ranz, cungj mbouj rox guh gijmaz ndei. Gou fwt siengj hwnj gij cozyez lauxsae buci haenx gou lij caengz sij, gou couh naengh youq baihnaj congh- cueng sij cozyez. Sawqmwh, gwnzmbwn fwj ndaem mbwn fuemx, bongj hwnj rumzhaen, yaek doekfwn lo, gou vaiq gven ndei conghcueng.

Yaep he, sa sa sa, fwn doek lo, doek youq gwnz bohliz conghcueng yiengjdaekdaek. Fwn yied doek yied hung, gou daj bohliz yawj coh baihrog, gyangmbwn lumj venj miz gaiq yiemzcaw gvangqlangh, baenz benq mokmbwtmbwt. Fwn doek youq gwnz vax dingjranz doiq- mienh, sinz hwnj baenz duj baenz duj varaemx, caengz mok he goemq youq gwnz dingjranz. Raemxfwn swnh yiemhranz lae roengzdaeuj, gwnz dieg raemx yied daeuj yied lai, gyoebbaenz baenz diuz baenz diuz rij iq.

Caen dwg ciengz fwn gibseiz ndeu ha! Go haeuxyangz ndaw reih itdingh dwg ndaej gwn donq imq lo. Gou lumj yawjraen raemxfwn lae haeuj ndaw reih, lae haeuj ndaw suenmak, lae haeuj ndawsim gyoengqvunz bae.

Fwjndaem sanq lo, fwn dingz lo, daengngoenz ciuq rongh daihdeih. Gou hai doucueng, raq heiq liengzsisi he ci haeuj naj daeuj, hoengheiq lumj swiq gvaq nei, gig singjsien. Go haeuxyangz、go faexliux rog cueng deng fwn rwed gvaq le, bienq ndaej engq heuloeg, ndeiyawj raixcaix.

（指导老师：韦丽平）