Ok hanh lai sied bae haujlai yingzyangj doxgaiq.

Mbwn ndataeng seiz, aenndang vihliux sanqfat gij ndat ndaw ndang okdaeuj, ngoenz ok hanh 3 daengz 10 swngh baenzlai. Gij hanh lae okdaeuj haenx, cawz bak faenh cih 99 dwg raemx le, lij miz bak faenh cih 0.3 dwg naz、gyaz、gai、meij daengj veizlieng yenzsu caeuq vuzgihyenz. Gij huq neix doiq ndang vunz gig youqgaenj. Linghvaih, ndaw hanh lij hamz miz yujsonh、niusu、anh、anhgihsonh daengj doxgaiq; ok hanh daiq lai rox hawj veizswnghsu C、veizswnghsu B1、veizswnghsu B2 ndaw ndang sied bae lai.

Mbwn aeng seiz, daihliengh ok hanh youh hawj raemx ndaw ndang sied bae lai, yingjyangj raemxsiuvaq iemqok; gwn raemxgoenj lai youh heuz saw veisonh, yinxhwnj vunz amqbak mbouj ndei, doengzseiz goengnaengz conghsaej hix deng cigciep gemjnyieg, rengz siuvaq supsou doxgaiq doekdaemq. Bouxlaux、boux bingh lai ndang nyieg caeuq boux guh hongnaek couh yungzheih okyienh yingzyangj mbouj ndei, caemhcaiq miz foegfouz、noh hoet、rengz dingj bingh doekdaemq, yungzheih baenz gak cungj bingh.

Aeu guh ndei fuengz hwngq gyangq raeuj.

Conhgyah daezok, vih an’onj doh gvaq seizhah, mboujlwnh dwg gijmaz vunz, cungj aeu haeujsim gaijndei gunghcoz caeuq swnghhoz vanzging, guh ndei hong fuengz hwngq gyangq raeuj; caemhcaiq haeujsim gwn di gijgwn yingzyangj、ndang vunz aeu miz haenx, habdangq lai gwn gij doihduz hamz laianhsonh lai he, lai gwn lwgmak hamz veizswnghsu lai haenx, daeuj baujcwng aenndang sup haeuj baiz ok sihyau.