Bineix ndwencieng mbanj gou hai ciengz vanjvei he, neix dwg mbanj gou baez daih’it hai vanjvei.

Vanjvei seizgan dingh youq ndwencieng co’ngeih banhaemh, youq cauhcangz hagdangz hai. Co’ngeih ngoenzhaenx, vunz ndaw mbanj bouxboux cungj gig nyaengq. Dou gyoengq lwgnyez hix maqmuengh ciengz vanjvei neix vaiqdi daeuj- daengz. Banringz seiq diemj cung, gou caeuq daxmeh daeujdaengz hagdangz. Gyoengq yenjyenz gaenq youq gizhaenx cangndang lo, yawj gyoengqde cang ndaej geijlai ndeiyawj ha, gou hozhaenz raixcaix.

Vanjvei hainduj lo, bouxcujciz bauq cezmuz le, gyoengqvunz sikhaek dingh roengzdaeuj, sing gyonglaz、sing bauqva yiengj hwnjdaeuj lo, nauhyied raixcaix. Gou caeuq daxboh naengh youq baiz daihngeih baihnaj daizheiq, youq gizneix gou gojyij yawjraen daengx aen daizheiq. Daih- it aen cezmuz dwg diuqfoux《Goengheij Fatcaiz》, gou yawjraen daxmeh youq ndawde diuq, gou yiengq daxmeh hemq sing he, daxmeh dingq mbouj nyi, daxmeh cij goq nyinhcaen diuqfoux. Daengz doengzhag hagdangz dou byaujyenj《Foux Faexsaux》aen cezmuz neix lo. Mwngz yawj, gyoengq dahcej daeggo diuq ndaej geijlai ndeiyawj ha! Gou geijlai siengj hix hwnjbae diuq ha. Foux faexsaux diuq sat le, gyoengq vunz cungj bek fwngz sasa. Seizgan gvaq ndaej gig vaiq, yaepyet daengz gyanghaemh cibngeih diemj cung lo, hoeng baihlaj gyoengqvunz lij gig nyinhcaen yawj byaujyenj.

Baez vanjvei neix hai ndaej gig cwngzgungh, doenggvaq baez vanjvei neix, ndaej rox mbanj dou bouxak gig lai, mehbaj mehsimj、bohlungz boh- au, dahcej daeggo caeuq lwgnyez bouxboux cungj rox ciengqgo diuq- foux. Haemh vanjvei neix geijlai hawj vunz nanzlumz ha! Gou gig maqmuengh bimoq ndwencieng vaiq- di daeujdaengz, gou hix aeu hwnjdaiz bae ciengqgo diuqfoux.

(指导老师：李丽君)