Ranz gou ciengx miz duz meuz ndeu, gij bwn gwnz ndang miz hau miz henj, caen dwggyaez, gou an aencoh hawj duzmeuz heuh “mihmih”. Mih- mih aen’gyaeuj luenzlili, doiq da ronghrikrik, baez daengz gyanghwnz laepngaungau, couh lumj song aen daengbau rox fat rongh nei, couhcinj duznou buet ndaej gig vaiq, hix deuz mbouj gvaq lwgda rongh mihmih. Rwz mihmih gig raeh, mbouj lwnh duznou gangj vah geijlai sing iq, mihmih hix dingq ndaej nyi. Seiq cik ga mihmih mbaeumbet, byaij loh cungj mbouj miz saekdi sing.

Mihmih gawq dam ninz youh dam guhcaemz. Gyang- ngoenz cungj raen mihmih ninz, miz vunz byaij gvaq henz, de hix dwg hai da yawj mbat he le, youh laep da ninz lo. Ninz gaeuq le cij hwnjdaeuj ietiet hwet, ajaj bak, saenqsaenq aenndang, byaij yotyot bae guhcaemz. Ndaw gyanghongh, gwnz veizciengz, dingjranz …… de cungj bae youz daengz. Miz seiz lij daj giz sang diuq roengzdaeuj, hix mbouj lau in.

Mihmih gaeb nou gig ak. Baez dingqnyi sing duznou, couh sikhaek coemj gvaqbae, baez coemj dawz duznou, bak couh haeb， yaepda duznou couh deng haeb dai lo. Seizneix ranz gou duznou cungj mbouj gamj daeuj lo.

Duzmeuz ranz gou caen ak, gou gyaez duzmeuz ranzgou.

(指导老师：陆小媚)