Ciengzseiz conghhaex humz: Aeu benq sanghsizgauh ndeu, haemhnaengz yaek ninz seiz nem haeuj conghhaex bae, haet daihngeih sik ok, lienz nem 3 ngoenz.

Lwgnyez mbwq gwn: Aeu 3 cienz maksanhcah, 1 cienz naeng dawgaeq, dwk buenq vanj raemx cawj haeux cug, yaek gwn haeux gaxgonq gwn liux, ngoenz 2 baez, lienz gwn 3 ngoenz, ndaej sek dungx、bang siuvaq.

Aek in: Aeu benq naeng makgam ndeu baeng youq gwnz saejndw, caiq cauj buenq gaen gyu ndat(gaej ndat lai, mienxndaej log sieng naengnoh), dwk youq gwnz naeng makgam, doq sikhaek dingz in.

Loek gwn huqcab: Aeu buenq gaen byaekgep (gaej ronq soiq), cauj ndat dwk di lauzmou he baez dog gwn liux, huqcab couh riengz haex baiz okdaeuj.

Muz heuj: Haemhnaengz yaek ninz seiz gwn benq naeng makgam ndip ndeu, lienz gwn 2 daengz 3 ngoenz, ndaej yw lwgnyez roxnaeuz vunzhung ninz seiz muz heuj.

Myaiz rwi: Aeu buenq gaen byanouq cawz dungxsaej le dak sauj, cauj henj ngenz baenz mwnh, cung laeujhenj gwn, moix baez 2 cienz, ngoenz baez, gwn liux doq ndei.

Lwgnyez noix gai: Moix baez aeu 5 cienz byuk nyauh, 1 liengx haijdai caez baek raemx dwk gyu dwk youz gwn, ngoenz baez, lienz gwn byongh ndwen.

Hangzgauqmou: Aeu meiq caeuq raemxmaeg ciuq 1 : 1 heuz ndei, mauzbit yub aeu led giz hangzgauqmou, ngoenz led 5 daengz 6 baez, itbuen led 2 daengz 3 ngoenz gizde couh siu foeg.