Makcaujnding ngauz dang: Aeu makcaujnding、raetngaenz caeuq dangznae itheij ngauz dang gwn, ndaej dingz ae nyinh bwt. Aeu 20 gwz raetngaenz, 20 aen makcaujnding, 60 gwz dangznae. Dwk raetngaenz roengz raemxgyoet bae cimq gawh, raed gaenq bae sik baenz vengq iq, caeuq makcaujnding、dangznae itheij dwk rek, gya 6 vanj raemx feizhaenq coemh goenj le gaij yungh feiznumq caiq ngauzcawj byongh diemj cung couh baenz gwn.

Makcaujnding cimq raemx: Makcaujnding naeng genq nanz siuvaq, danghnaeuz baenz aen cimq raemx, gij mizyauq cwngzfwn de nanz yungz okdaeuj, ndigah ceiq ndei dwg mbek ok caiq cimq raemx. Aeu haeujsim dwg, makcauj heu mbouj hab cimq raemx roxnaeuz baek raemx, aenvih de hamz veizswnghsu C lai, yungh raemxndat cimq rox buqvaih veizswnghsu C youqgaenj.

Makcaujnding cimq caz: Cauj de ndaem le cimq guh caz gwn, ndaej yw dungx caep、dungx in. Danghnaeuz dwk noh maknganx itheij cimq gwn, engq bouj lwed bouj heiq.

Makcaujnding cawj gyaeq: Makcaujnding gya noh maknganx baek raemx dangznding, daengz makcauj naemz noh maknganx unq seiz dub aen gyaeqgaeq ndeu roengzbae, laebdaeb yungh feiznumq cawj gyaeqgaeq cug. Makcaujnding、noh maknganx caeuq dangznding ndaej bouj lwed, gyaeqgaeq gig miz bouj.

Makcaujnding ngauz cuk: Ndaw cunghyih gangj- naeuz, mehmbwk sim fanz mbouj onj, ndaej yungh habliengh beghab、cehmbu dapboiq makcaujnding daeuj diuzleix. Danghnaeuz caeuq haeuxfiengj caez cawj, an saenz yaugoj engq ndei.

Makcaujnding cimq laeuj: Mwh cimq makcaujnding gocwngz ndawde, youjgihvuz yingzyangj yungzheih yungz youq ndaw laeuj, gwn de ndaej baujciz sailwed doengswnh.