Danghnaeuz mwngz cam gou: “Mwngz ceiq gyaez boux lawz?” Gou couh mbouj ngeiz dwk naeuz :“Gou ceiq gyaez daxmeh gou.”

Daxmeh gou dwg boux nungzminz lauxsaed ndeu. De gaenq seiqcib lai bi lo, de gig gaenx guhhong, moix ngoenz cungj dwg caeux ok haemh dauq, ndigah yawj yiengh de beij saedsaeh nienzgeij laux haujlai, gwnz gyaeuj gaenq miz haujlai byoemhau, doiq fwngz cocatcat. Daxmeh mboujdan guh gij hong reihnaz, ndaw ranz lij ciengx miz haujlai gaeq caeuq bit. Gij hong neix sawj daxmeh baenz ngoenz nyaengq mbouj dingz, baez yawjraen gij cingzgingj neix, ndawsim gou gig nanzgvaq.

Seizneix, gou gaenq ndaej 10 bi lo, daxmeh coengzlaiz mbouj hawj gou bae guh gijmaz hong, gij buhvaq gou rieg roengzdaeuj haenx, hix dwg daxmeh bang gou saeg. Gou siengj gag saeg buhvaq, daxmeh cungj dwg yienghneix doiq gou gangj: “Gij hong neix mbouj yungh mwngz guh, seizneix cujyau yinvu mwngz dwg yozsiz, cijaeu mwngz yozsiz couh ndaej lo.”

Daxmeh gou couhdwg yienghneix gaenx guhhong, gou gyaez daxmeh gou, gou aeu roengzrengz doegsaw, aeu ndaej ndei cingzcik daeuj bauqdap daxmeh. （指导老师：韦凤玲）