Daxboh gou dwg boux lauxsae cunghyoz ndeu, de maj ndaej hungsang, ciengzciengz mbe aenbak riuhehe. De bineix 35 bi, hoeng gwnz gyaeuj gaenq miz byoemhau lo, daxmeh gangj haenx dwg daxboh guhhong dwgrengz, causim lai cij miz byoemhau.

Daxboh geijlai gyaez gou ha! Geiq ndaej miz bi ndeu roekit ciet lwgnyez, gou yaek hwnj daiz ciengqgo, lauxsae heuh gou cangndang gyaeundei di. Dauqma ranz seiz, gou doiq daxmeh gangj, gou siengj cawx geu vunj moq ndeu daenj hwnj daiz ciengqgo, daxmeh dingq le, singhung naeuz：“Mwngz gaenq miz sam seiq geu vunj lo, lij cawx dem?”Daxboh youq henz dingq le, mbouj gangj gijmaz. Gvaq geij ngoenz le, gou fatyienh gwnz congz gou miz geu vunj moq gyaeundei ndeu, lij geb miz mbaw ceij ndeu, baihgwnz sij naeuz：“Dahlwg dwggyaez, hoh mwngz roekit angqyangz! Daxboh.” Seizhaenx, sim gou youh angq youh geizheih. Yenzlaiz geuvunj dwg daxboh youq gwnz muengx bang gou cawx. Gou daenj bae hagdangz seiz, gyoengqdoih cungj haenh geuvunj gou gyaeundei, cungj hozhaenz gou, gou sim’angq raixcaix.

Bingzseiz daxboh lij saeqsim son gou hagsib, naihsim buenx gou hag gwih danci, hag youzraemx……

Daxboh gou caen ndei! Gou gyaez daxboh gou!（指导老师：覃珍团）