Gij fai hung caeuq fai rauh youq mwh daih hamjyat guh haenx, mizmbangj aenvih hong geizgonq guh mbouj ndei geijlai couh haigoeng, caiq gangj seizhaenx gisuz mbouj gaeuq, gingniemh noix, gij hong guenjleix gaen mbouj hwnj, cizlieng yaez, lij miz haujlai giz yungyiemj. Veiz Gozcingh haemq yousim lau fai hung caeuq fai rauh oksaeh, ciengz bae ra boux dinghcangj suijdendingh Cai Yungj- veiz caeuq gyoengq conhgyah dox- yaeng, nda’nduengq geiqmaeuz bouj gouq dauqma. Youq de liznyaemh gaxgonq, gihbwnj guh sat gij hong gyamaenh Dahcwngzbizhoz、Dahvang- swnggyangh、Davangzdanh、Gveihsiz、Gwzlanz、Bingzlungz、Dahfungdingz- hoz daengj fai hung caeuq fai rauh haenx, baizcawz giz yungyiemj. Aen fai Dahcwngzbizhoz dwg aen fai daengx gih rom raemx ceiq hung ndeu, daj bi 1972 hwnj hainduj cawqleix namhfai liux caez, gungh cuk baenz faqciengz re raemx iemq namh- doxgyaux aenfai 377 lai mij, cauh cikmboncongh 92 fanh mij, gonh hoemq namhdoxgyaux 17 fanh liz- fanghmij. Bi 1974 cawqleix sat le, sojmiz diegdumh iemq raemx caeuq giz gvanhcaz iemq raemx, cienzbouh dwg hawqsauj caez, yaugoj gig ndei. Veiz Gozcingh naeuz: “Yienghneix gyamaenh cawqleix, daihgya cungj cuengqsim lo!” Doiq mbangj goek- mieng caeuq ngamieng raemx iemqlaeuh youqgaenj haenx, yungh gij benjyawhguh suijniz roxnaeuz rinbenq daeuj caiq caep caengz baihndaw dem, guh baenz gij mieng sam mienh ngaeuz. Lij doenggvaq dem raez diuzmieng, hawj gij fai iq caeuq yinxraemx gunghcwngz doxlienz hwnjdaeuj, mbehung rwed raemx menciz. Aen fai Vujswhgyangh rom raemx miz ik lai lizfanghmij haenx, bi 1970 haidaeuz guh gij hong boiqdauq, gyasang gyamaenh goekmieng 18 goengleix, gyaraez goekmieng 62 goengleix, haivat ngamieng 148 goengleix、miengdaeuj 780 goengleix, hwnjguh gij fai diuzciet 4 aen caeuq 17 aen camhdwkraemx, guh baenz aen muengx miengraemx rom、yinx、daez doxgap ndeu, hawj rwed raemx menciz daj nyuenz sezgi 21 fanh moux mbehung daengz 30 lai fanh moux.

Daj bi 1971 daengz bi 1975, daengx aen swcigih guh baenz fai hung moq rom ndaej ik lizfanghmij raemx doxhwnj haenx aen ndeu, 53 aen fai rauh rom ndaej 1000 fanh daengz ik lizfanghmij raemx haenx, guh baenz 7779 goengleix mieng sam mienh ngaeuz, caemh gyamaenh le 7 aen fai hung caeuq 41 aen fai rauh.

(caengz sat)