Miz boux bozsw ndeu faen daengz aen yenzgiusoj he bae guhhong, baenz le aen yenzgiusoj neix boux vwnzbingz ceiq sang ndeu.

Ngoenz he, de bae aen daemz iq raeblaeng danhvei ep bya, cing fusojcangj cingqngamj bouxswix bouxgvaz youq henz de ep bya.

De cijdan caeuq cing fusojcangj ngaekngaek gyaeuj, song lwg bwnjgohswngh neix, miz maz ndei caeuq de gangjvah?

Yaep ndeu, cingsojcangj cuengq roengz diuz faexset, ietnonx aenhwet, lumj mbin nei diemjyet diemjyet dwk daj najraemx biu bae coh aen diengzhaex doiqmienh.

Bozsw da daengx lo. Mbin gwnz raemx? Mbouj dwg ba? Neix dwg aen daemz iq ndeu.

Cingsojcangj ok haex sat, dauq- ma seiz hix dwg diemjyet diemjyet biu gvaq najraemx daeuj.

Neix dauqdaej dwg maz saeh? Bozswswngh youh mbouj ndei eiqsei cam, swhgeij bitgingq dwg boz- swswngh ya.

Gvaq yaep ndeu, fusojcangj hix ndwn hwnqdaeuj, byaij geij yamq, doq diemjyet diemjyet biu gvaq najraemx bae coh diengzhaex. Mbatneix boz- swswngh ca di ngunh laemx lo. Mbouj dwg ba? Nanzdauh dwg giz boux youzbyaij seiqgyaiq goengfou ceiq ak rom youq neix?

Bozswswngh hix ndaemq nyouh lo. Aen daemz neix song henz cungj miz ciengzhumx, gvaenx gvaqbae daengz diengzhaex doiqmienh aeu byaij 10 faen cung, dauqbae danhvei youh gyae lai, baenzlawz guh ne?

Bozswswngh hix mbouj siengj haibak cam cing fusojcangj, nyaenx youq byongh ngoenz, couh hwnqndang byaij roengz daemz bae: Gou couh mbouj saenq song lwg bwnjgohswngh byaij gvaq najraemx bae ndaej, gou boux bozswswngh ndeu gvaq mbouj ndaej bae?

“Bum” sing ndeu, bozswswngh laemx roengz ndaw raemx bae lo.

Song boux sojcangj rag de hwnjdaeuj, cam de vihmaz aeu roengz raemx bae. De fanj cam: “Sou yawz byaij ndaej gvaqbae ne?”

Song boux sojcangj doxcim le riu naeuz: “Ndaw daemz miz song baiz donghfaex, song ngoenz neix aenvih doekfwn, donghfaex deng mued youq ndaw raemx lo, dou caeux couh rox baiz donghfaex daengj youq gizlawz, ndigah caij gvaq gwnz donghfaex gvaqbae. Mwngz yawz mbouj cam saek coenz ne?”