Daeg mbauq lajmbanj he daiq dab ngaenz bohmeh mbaet gwn mbaet yungh sinhoj baenz ciuhvunz cij rom ndaej daeuj haenx bae daengz Gvangjcouh cauxnieb. Danhseih, gvaq sam ndwen le, daeg laujyangh caeuq de doxgap guh seng’eiq haenx couh gag dawz ngaenz ndot deuz lo. Ienqhoij、gaet faenz maenj heuj、fouznaih、doeknaiq itcig geuj youq ndawsim de, de siengj daengz dai le suenq lo.

De youq gok giuz giz doekgungx haenx bu mbaw bauqceij gaeuq ndeu ninz roengz, ndaw uk luenhyabyab. Mwhhaenx, miz meh he daihgaiq 60 bi hwnjroengz gaem bog bauqceij ndeu yiengq de byaij gvaqdaeuj naeuz, sienseng, cawx bauqceij lwi? De fwngz mbon roengz daeh bae, lumh ndaej naed ngaenzdih ndeu, dawz okdaeuj baez yawj, dwg maenz ngaenz ndeu. De siengj, danghnaeuz yungh naed ngaenzdih neix cawx faenh bauqceij ndeu le, gwnz ndang couh caiq hix mbouj miz saek faen ngaenz lo. De lawq yaep ndeu, mbouj cingznyienh dwk ndenq naed ngaenzdih gvaqbae, meh gai bauqceij cawz hawj de faenh bauqceij ndeu le, lij doiq dauq hawj de mbaw ngaenzceij haj gak he.

De sawqmwh raen gwnz bauqceij miz gvaengh ciubingq gijsw ndeu sij naeuz: Aen gunghswh dou gouz vunzcaiz lumj hozhawq, ndatcingz iucingj boux miz sim daeuj caemhdoih cauxnieb…… De sim doengh lo, menhmenh byaij roengz laj giuz bae, youq ndaw diengzdienhvah bued hauhmax hwnjdaeuj. De cuengq ndei dingqdoengz, ndenq haj gak ngaenz gvaqbae, lauxbanj doiq dauq hawj de naed ngaenzdih it gak he. De gaem ndaet naed ngaenzdih youq ndaw fwngz, gietdingh bae aen gunghswh haenx bungqbungq seizheiq.

Ra baenz byongh ngoenz cungj suenq ra raen aen gunghswh haenx lo, de gaemz heiq ndeu dawz gij saeh fatseng youq gwnz ndang swhgeij lwnh hawj lauxbanj nyi. Lauxbanj hozswnh dwk doiq de naeuz: Docih mwngz saenq ndaej dou, ngawzmuengh mwngz camgya haeuj aen gunghswh dou daeuj. Daegmbauq ndenq naed ngaenzdih gvaqbae, gyangznaek dwk naeuz: Cawz naed ngaenzdih neix le, gwnz ndang gou saedcaih mbouj miz saek faen ngaenz lo, haet neix gou lij caengz ndaej gwn haeuxcaeux dem bw! Lauxbanj riu le riu, doiq de naeuz: Caencingq caizfouq bingq mbouj dwg dawz caizcanj lainoix daeuj dagrau, cix dwg yungh geiqmaeuz ndaw uk caeuq bouxvunz giengiengz miz saenqsim daejyienh okdaeuj. Gangj sat, song cik fwngz gaemdawz ndaetndwd youq itheij haujlai nanz mbouj cuengq.

Daeg mbauq neix louz roengzdaeuj lo. Gvaq sam bi, deng lauxbanj daezswng nyaemh guh ndaw gunghswh fucungjginghlij. Seizneix, de miz le gij canjyez swhgeij, swhcanj mauhgvaq bak fanh, hoeng ndaw uk de mad mbouj ndaej bae, dwg naed ngaenzdih haenx coi hawj de bae buekmingh laemxsim haenq guh, dwg naed ngaenzdih haenx hawj de daiq daeuj caizfouq moq.

Mehmbwn miz lwgda, de mbouj gojnaengz hawj mwngz yiengh ndeu cungj mbouj miz. Mwh saetbaih seiz, cingj molumh ndaw daeh, saekseiz miz saek naed ngaenzdih lamq youq ndawde, hix gojnaengz naed ngaenzdih neix couh dwg mehmbwn daegdaengq louz hawj mwngz fag yaekseizgim hai aen dou caizfouq haenx. Cingj siengsaenq, mehmbwn miz lwgda, mwngz lij miz maqmuengh!