Ndangraeuj diuzcez goeng- naengz nyeznomj caengz fatmaj caezcienz, roxnaeuz ndang nyieg rengz dingj bingh ca, nanz dingj ndaej ndataeng. Nyeznomj mwh mbwn ndataeng、hoengheiq mbaeqdoh daih、mboujmiz rumz、hanh fwifat sinhoj、gij ndat ndaw ndang daiq lai seiz yungzheih baenz fatsa, mbaeu cix okyienh gyaeuj in、gyaeuj ngunh、rubmyaiz、rueg ok、ndangraeuj daemq、saeknaj haumiek、naengnoh ok hanh lai daengj yienghsiengq, naek cix okyienh oqndat、diemheiq feuh、meg diuq nyieg、hezyaz doekdaemq、yisiz mbouj cingcuj daengj binghyiengh. Naengh nyeznomj okyienh fatsa mbaeu seiz, ndaej senj de bae gizdieg liengzsangj yietnaiq, doengzseiz hawj de gwn di raemxgyu cit he, roxnaeuz 5% raemxdangz goenj daengj. Yietnaiq le bingh loq ndei roxnaeuz siu bae caez, danghnaeuz caengz siu bae, wng gibseiz soengq bae yihyen genjcaz aeu yw.

Yawhfuengz nyeznomj fatsa gvanhgen dwg bingzseiz haeuj- sim guh ndei yawhfuengz cosih. Ok rog ranz bae hozdung seiz, gaej hawj ndithaenq cigciep ciuq daengz gwnz ndang. Youq ndaw ranz hozdung seiz, ndaw ranz aeu baujciz doeng rumz doeng heiq ndei, daenj buhvaq aeu gvangqsoeng; gwnndoet aeu citdamh yungzheih siuvaq, hawj de ciengz gwn di caz vagut、dangduhheu、 danglwglimz ndeu.

Haeujsim nyeznomj gwn- ninz gvilwd, hawj de ninz gaeuq, guh ndei yawhfuengz baujgen cosih, couh ndaej hawj de ancienz dohgvaq seizhah lo.