Gou miz boux daxmeh gyaez gou ndeu, de samcib lai bi lo, aenndang miz di sang, vunz byom di, yienhndaej gig reux. Daxmeh gou miz doiq bwnda gungjgetget ndeu, youh saeq youh ndaem, gig ndei yawj, doiq da de ndaemlik singjsag, aenndaeng gig sang, aenbak mbouj hung mbouj iq ndeiyawj dangqmaz.

Daxmeh gou gig gyaez gou, youq ndaw uk gou miz haujlai saeh lumj raemx lae ityiengh gipgip lae bae, hoeng miz gienh saeh ndeu itcig louz youq ndaw uk gou. Youq gou doeg ngeih nienzgaep seiz, gou youq gwnz cauhcangz guhcaemz seiz, sawqmwh daraiz laemx youq gwnz dieg, seizhaenx lauxsae caeuq doengzhag cungj hwk lau lo. Daxmeh cingq youq ndaw reih guhhong, de ciepdaengz dienhvah lauxsae le, gipgip muengzmuengz daj ndaw reih ganj daengz hagdangz, dawz gou soengq bae daengz yihyen. Gou singj gvaqdaeuj le, cij raen daxmeh simgip naengh youq henz gou, gwnz naj cungj dwg hanh, buhvaq deng hanh cimq dumz lo, gok da lij daiq miz raemxda, cigdaengz canghyw vih gou genjcaz sat gangj mbouj miz saeh le, daxmeh cij soeng gaemz heiq ndeu.

Daxmeh yienznaeuz gig gyaez gou, hoeng doiq gou hix gig yenzgwz, moix baez gou famhloek le cungj ndoj mbouj gvaq lwgda daxmeh. Moix baez gaujsi gvaq le, daxmeh cungj bang gou faensik vih gijmaz guh loek.

Neix couhdwg daxmeh gou, de hawj gou sengmingh, sawj gou angqyangz vuenyungz majhung, son gou baenzlawz guh vunz guh saeh. Gou gyaez daxmeh gou.

（指导老师：覃庆赔）