Mbouj geij nanz, raeuz couh yaek doxbiek lo, biek aen hagdangz gyaeundei, biek gij doengzhag ngoenzngoenz guhdoih haenx. Youq ndaw siujyoz roek bi neix, louz hawj gou dauqngeix gig nanzlumz, miz van, miz haemz, miz soemj……

Lij geiq ndaej, ngoenzhaenx haetromh, daengngoenz ngamqngamq daj baihdoeng swng hwnjdaeuj, ndawsim gou gig gikdoengh dwk yamqhaeuj hagdangz youh gyaeundei youh najseng haenx bae, gij doengzhag gou boux lawz cungj mbouj roxnaj, ndawsim gou gig lau, hoeng, gou lij geiq ndaej, dwg banhcujyin gou——Cinz lauxsae, de gaem fwngz gou, daiq gou bae caeuq gyoengq doengzhag roxnaj, menhmenh dwk gou caeuq gyoengq doengzhag sug lo, doxndei lo.

Lumz mbouj ndaej, gou lumz mbouj ndaej gyoengq doengzhag, dwg gyoengqde itcig gig bauyungz gou. Gou rox swhgeij beizheiq mbouj ndei, hoeng, gyoengqde mbouj dawz haeuj sim, lij caeuq gou itcaez hagsib, guhcaemz. Youq neix, gou doiq gyoengq doengzhag gangj: Doiq mbouj hwnj, yienzliengh gou gaxgonq mbouj roxsoq.

Youq ndaw roek bi neix, raeuz daj boux siujbaengzyoux mbouj roxsoq bienqbaenz boux daeggo dahcej roxsoq lo. Raeuz doxnyangz youq ndaw seizcin roeg hemq va rang, doxrox youq ndaw seizhah mbwnndat, doxbang youq ndaw seizcou aenmak henjlwglwg haenx, doxndei youq ndaw seizdoeng nae hausaksak haenx. Youq ndaw roek bi neix, raeuz dwg baengzyoux gig ndei lo. Gou sieng- saenq yienznaeuz raeuz doxbiek lo, danhseih sim raeuz lij lienz youq itheij, faenh cingzngeih neix raeuz lumz mbouj ndaej hix mbouj miz gij- maz lawh ndaej de.

Seizgan gvaq ndaej gig vaiq, yaepda couh roek bi lo, gou siengj cam bouxlaux seizgan, ndaej mbouj ndaej dawz seizgan bued menh di. Aenvih gou mbouj siengj baenzneix vaiq bizyez, mbouj siengj baenzneix vaiq biek gyoengq doengzhag ngoenzngoenz guhdoih haenx, mbouj siengj biek aen hagdangz gyaeundei sugsed haenx!

（指导老师：覃海洋）