Baenzin dwg cungj byauling doxgaiq lawh gaeuq ok luenh le yinxhwnj lwed niusonh swng sang baenzbingh, cujyau caeuq yizconz yinhsu mizgven. Gwnndoet mbouj ngamj dwg aen cujyau yenzyinh yaeuhfat baenzin ndawde aen ndeu. Boux baenzin danghnaeuz gwn gijgwn hamz byauling doxgaiq lai seiz couh yungzheih baenzin lo. Gijgwn hamz byauling doxgaiq lai haenx cujyau miz laeujbizciuj, gak cungj daep、mak、simdaeuz doihduz、bya、haijsenh、duh caeuq gij huq aeu duh guh、byaekbohcai.

Dingzlai byaekheu、lwgmak、cijvaiz、gyaeqgaeq hamz byauling doxgaiq haemq noix, ndaej lai gwn di.

Daegbied aeu haeujsim dwg, byauling doxgaiq yungzheih yungz youq ndaw raemx, naengh bungz daengz ndat yungz ndaw raemx engq vaiq. Gak cungj dang lumj dang ndoksej、dang nohgaeq、dang hojgoh daengj hamz byauling doxgaiq gig lai, ndaw noh hamz byauling doxgaiq dauqfanj haemq noix. Ndigah, boux baenzin ceiq ndei cijdan gwn noh, ciengeiz gaej gwn dang bw. (Dwng Cez)