Bouxboux vunz cungj miz lijsiengj swhgeij, lijsiengj gak boux vunz cungj mbouj doengz, aen lijsiengj gou dwg guh boux lamzgiuz yindungyenz okmingz ndeu.

Guh lamzgiuz yindungyenz, mwh dwkgiuz couh aeu daenj geu buhyindung, vihneix lauxsae heuh gou baema caeuq daxmeh siengliengz, aeu ngaenz bae cawx. Yienznaeuz gangj dwg siengliengz, danhseih neix dwg gij saeh gig haengjdingh lo. Ma daengz ranz, gou caeuq daxmeh gangj le, daxmeh cix naeuz: “Ndaw ranz mbouj miz ngaenz.”Dingq gij vah daxmeh le, gou ndawsim gig nanzgvaq, gou rox ndaw ranz hoj, dou sam beixnuengx cungj lij iq, daxgoeng daxbuz laux lo, daxmeh youq ranz fugsaeh lauxiq, dan baengh daxboh boux dog youq rog ra ngaenz, baenzlawz mbouj hoj ne? Hoeng, guh boux lamzgiuz yindungyenz dwg aen lijsiengj gou, danghnaeuz gou aenvih mbouj miz ngaenz cawx geu buhyindung, couh deng doiq ok aen doih lamzgiuz, neix caen hawj gou simnyap.

Seizneix, daxgoeng youq henz gangj vah lo, hoeng gij vah daxgoeng engq hawj gou doeknaiq, de gingqyienz heuh gou cigciep doiqok lamzgiuzdui.

Ae! Baenzlawz banh ne? Gou giengiet mbouj haengj doiq ok lamzgiuzdui, vihneix, gou roengz- rengz guhhong, cawz bae guh caez gij hong daxmeh anbaiz haenx, miz seiz lij bang ranznden guh di saeh, yienghneix bouxlaux miz seiz hawj gou di ngaenz dangguh dajciengj, gou dawz di ngaenz neix rom roengzdaeuj cawx buhyindung.

Vihliux saedyienh aen lijsiengj gou, gou moix ngoenz baez ndaejhoengq couh bae giuzcangz lienh dwkgiuz, hawsim dingq lauxsae doengzhag daezok gij yigen doiq haenx, caiq bae gaijcingq. Cijaeu gou roengzrengz, gij lijsiengj gou itdingh ndaej saedyienh. (指导老师：黄吉星)