Danghnaeuz gou miz gonj saenzbit Maj Liengz, gou mbouj veh gim, hix mbouj veh ngaenz, gou aeu veh doiq lwgda ronghsagsag ndeu hawj bouxdafangz, hawj gyoengqde yawjraen saek seiqgyaiq hoengzhoengz heuheu, gyoengqde mbouj caiq youq ndaw laepngauq gvaq saedceij caeuq dwglau, naengz caeuq raeuz itheij yawjraen doxgaiq engq lai engq gyaeundei.

Danghnaeuz gou miz gonj saenzbit Maj Liengz, gou aeu veh aen daehsaw ndeu hawj lwgnyez lajmbanj, lij veh haujlai saw hawj gyoengqde, yienghneix gyoengqde couh naengz angqyangz bae hagdangz doegsaw, hag ndaej engq lai cihsiz.

Danghnaeuz gou miz gonj saenzbit Maj Liengz, gou aeu dawz dah iq veh ndaej sawndikndik; hawj goengqbya heusausau; hawj digiuz bienq ndaej engq gyaeundei! Hawj gij doxgaiq saet bae haenx caiq dauqma, hawj seiqgyaiq bienq ndaej engq ndei.

Gou muengh gou miz gonj saenzbit Majliengz ngoenzhaenx vaiqdi daeujdaengz, hawj gojgaeqfangz ndaw cienzgangj cungj bienqbaenz yienhsaed gyaeundei, hawj seiqgyaiq engq gyaeundei, hawj gyoengqvunz engq vuenyungz.

(指导老师: 覃玉往)