Geiq ndaej haemh haenx dwg 2 nyied 26 hau banhaemh, gou caeuq doengzdoih guhcaemz dauqma, baez haeuj ranz couh caenciet hemq “daxbuz, daxbuz”. Mbouj dingqnyi daxbuz han, gou nyoengx hai dourug, hai daeng le, yawjraen daxbuz ninz youq gwnz congz, diemheiq gig gaenj, gou muengz byaij gvaqbae sing unq cam:“Daxbuz, mwngz bingh la?” Daxbuz ngaekngaek gyaeuj, mbouj guhsing, cijdwg yungh song fwngz gaemh fwngz gou, seizhaenx gou roxnyinh gij fwngz daxbuz daegbied ndat. Gou rox daxbuz haengjdingh dwg fatndat lo, baenzlawz guh ne? Daxboh daxmeh cungj youq baihrog dajgoeng, neix baenzlawz guh cij ndei. Gou gietdingh bae aeu yw hawj daxbuz gwn. Gou daj ndaw gang cuengq cienz aeu cienz daeuj, buet bae coh veiswnghsiz ndaw mbanj.

Daengz veiswnghsiz ndaw mbanj, gou dawz gij bingh daxbuz lwnh hawj canghyw dingq, canghyw geiqloeg binghcingz le, couh hai yw hawj gou, daengq gou baenzlawz gwn yw le, gou couh ganjgip buet dauqma lo.

Ma daengz ranz, gou sien aeu raemxgoenj cung bauyw bwnq daxbuz gwn, yienzhaeuh caiq hawj daxbuz gwn ywnaed. Daxbuz gwn yw sat le, couh ninz lo, gou bang daxbuz hoemq denz ndei, couh byaij ok rug daeuj.

Gou gwn caeuz le, gaenq dwg banhaemh cib diemj cung lo. Gou haeuj rug bae yawj daxbuz, daxbuz lij ninzndaek, najbyak daxbuz ok hanh lo, gou youh momo laenghwet daxbuz, ya! Buh cungj dumz lo. Gou ganjvaiq aeu bat raemxraeuj daeuj, yungh sujbaq bang daxbuz uet ndang, youh bang daxbuz vuenh buh seuq. Muengz sat le, gaenq dwg gyanghwnz cibngeih diemj cung lo. Gyanghwnz caem- rwgrwg, gou gig ndeilau, mbouj gamj ndaep daeng, maqmuengh haemhlaep vaiqdi gvaqbae. Haemh haenx, gou mbouj gamj laepda, yousim baez ninzndaek, ndiu daeuj le, daxbuz couh mbouj raen lo.

Seizgan menhmenh gvaqbae, gou roxnyinh hwnz haenx raezrangrang.

(指导老师：韦志略)