Mehmbwk senglwg doeklaeng fatsa, vunzbingh ndangraeuj swng sang, meg diuq caeuq diemheiq gyavaiq, naj nding mbouj ok hanh, naengnoh hawq ndat, daengx ndang hwnj bitfiengj roxnaeuz ok hanh cix ndangraeuj doekdaemq. Gipgouq banhfap:

1、Raen mehsenglwg gaenq fatsa, wngdang sikhaek senj de bae giz doeng rumz ndei liengzsangj haenx yietnaiq.

2、Gej gaetbuh ok, hawj de gwn di raemxgyu cit roxnaeuz sizdizsuij、yinzdanh、ywnaed siu ndat、hozyangh cwnggisuij daengj, yaepyet couh hoizdauq ndei.

3、Boux baenz fatndat、maezgae、caeugaen, wng hawj de ninzngeng、gyaeuj ngiengx dauq laeng, baujcwng hawj de diemheiq doengswnh, cigouqhoh caengz daeuj daengz seiz, ndaej yungh sujbaq dumz roxnaeuz 30% daengz 50% ciujcingh mad fajaek caeuq raeblaeng de.

Haeujsim saehhangh:

1、Baez raen mehsenglwg gamj- daengz hozhawq、ok hanh lai、rub myaiz、gyaeuj ngunh、sim linj、aek mwnh daengj mbouj cwxcaih seiz, couh wngdang naemj daengz gojnwngz dwg fatsa lo.

2、Ndaw rug aeu hai cueng doeng rumz, baujciz habdangq dohraeuj, danhseih gaej hawj rumz cigciep ci daengz de. Denz gaej na lai, ndaej ninz diemxliengz, daenj buhvaq mbang, lai gwn raemx daengj.

3、Ok hanh lai seiz, ndaej ciengzseiz yungh raemxraeuj mad ndang, gaenx rieg buhvaq, yienghneix ndaej yawhfuengz baenz fatsa.