Gaenh geij bi daeuj, riengzdwk yihyozgai yenzgiu binghdungxsaej mboujduenh haeujlaeg, gyoengqvunz fatyienh gwn byaek noh gonqlaeng gig miz gohyoz, mboujnex, couh gojnwngz rox sienghaih dungxsaej gengangh.

Sien gwn byaekheu caiq gwn noh. Gyoengq yingzyangjyozgyah genyi naeuz, gwn byaek noh gonqlaeng wnggai dwg baenzneix: Sien gwn byongh vanj dang roxnaeuz boi raemxmak singjsien ndeu, ciep roengzdaeuj caiq gwn byaekheu, doeklaeng gwn noh caeuq gyaeq, baenzneix gawq ndaej hawj vunz hableix leihyungh gij yingzyangj gijgwn, youh ndaej gemjsiuj fudanh dungxsaej, vunz couh gengangh ndaej lai lo.

Gwn haeux sat gaej sikhaek gwn mak. Gak cungj gijgwn ndawde, lwgmak cujyau cwngzfwn dwg dangzmak, de mbouj yungh doenggvaq aendungx daeuj siuvaq, cix dwg haeuj daengz saejlwg bae cigciep deng supsou. Mboujgvaq, danghnaeuz gwn haeux sat doq sikhaek gwn lwgmak, dungxsaej couh aeu sien siuvaq supsou gij denfwnj、youzlauz caeuq danbwzciz gonq, doeklaeng cij ndaej supsou gij dangzmak ndaw lwgmak. Lwgmak youq ndaw ndang vunz diemj lai song diemj cung couh rox fatoemq, caemhcaiq naeuhlanh canjseng huq- doeg, vunz couh yungzheih baenz dungx in、saej humz daengj bingh.

Gwn haeux seiz caeuq gwn haeux doeklaeng mbouj hab gwn dang. Gwn haeux seiz gwn dang, aenvih haeux caengz ndaej cungfaen nyaij mienz couh riengz dang ndwnj roengz dungx, gwn haeux sat doq gwn dang dwg aenvih raemxdang rox heuz saw raemxsiuvaq, dungxsaej siuvaq naengzlig couh gemjnyieg, caemhcaiq rox yinxhwnj aendungx mbe’gvangq gvaqbouh, nanz le, couh rox baenz doenghlig aendungx mbouj gaeuq.

Daj neix ndaej rox, caengz gwn haeux gaxgonq sien gwn byongh vanj dang ndeu haemq hab sengleix iugouz, aenvih de ndaej youq caengz gwn haeux gaxgonq diuzsaej couh deng dumznyinh, doengzseiz ndaej coi raemxsiuvaq miz gvilwd dwk iemqok.