Ngoenz ndeu haetromh, gou deng daxmeh heuh ndiu lo. Gou baez hai conghcueng, couh raen gyaq cizswnghgih ndeu dingz youq ndaw hongh, daj ndaw cizswnghgih byaij ok boux vunzgihgi ndeu.

Boux vunzgihgi neix gig geizheih. De rox mbin, mbin daengz gwnz daizsaw gou daeuj. Gou sijsaeq yawjyawj bouxhek neix: Gwnz gyaeuj miz song diuz gaeu, gwnz gaeu sieng miz song aen giuzcaijsaek. Song aen giuz yaep he bienqbaenz saekhenj, yaep he bienqbaenz saeknding, caen gyaeundei. Boux vunzgihgi neix mbouj miz naeng, hix mbouj miz bak, gaiqfwngz cijmiz seiq lwgfwngz, gojyij yietraez, ndaej yaep he hai, yaep he gven, couh lumj gij gimz duzbaeu nei. Din gig raez, gojyij byoq ok feiz daeuj, de couh dwg baengh aen neix rox mbin.

Gou cingq ngeizngwd yawj de, sawqmwh de gangjvah lo: “Ha! Mwngz ndei, gou heuhguh Sahmuj, dwg daj gwnz ronghndwen daeuj. Dingq gangj, gwnz singhgiuz sou gig gyaeundei, dwg gaiqdieg vaiqvued ndeu, gou siengj daeuj youzyouz, mwngz naengz dang daujyouz gou lwi?” Gou angq dwk gangj: “Ndei ha!” Gangj sat, gou couh daiq de okbae lo. Dou sien bae youz gunghyenz, gaendwk daeujdaengz gwnz gai, doeklaeng daeujdaengz ndaw bouqgaicawx. Gou daiq de cawx ndaej hauhlai doxgaiq, de daj ndaw dungx yut ok gaiq gim ronghsag ndeu daeuj, de gangj: “Hawj ngaenz hawj mwngz.” Gou riu dwk naeuz: “Dou mbouj yungh cungj neix.” Gou daj ndaw daeh mbon ok mbaw cienz ndeu daeuj, doiq de gangj: “Mwngz yawj, dou dwg yungh cungj neix.” Gangj sat, gou couh bae gyau cienz lo. Byaij ok bouqgaicawx, boux- vunzgihgi naeuz:“Docih mwngz, ngoenzneix gou gig vaiqvued, aen neix soengq hawj mwngz.” Gangj dwk, de couh daj gwnz hoz mbaet aeu aen ndaundeiq ndeu hawj gou, de gangj:“Neix dwg ndaundeiq vaiqvued, maqmuengh mwngz ciengxlwenx vaiqvued.” Gangj sat, de fwt dwk mbin hwnj mbwn bae lo.

Boux vunzgihgi neix dwg baengzyoux ndei gou, gou naengz roxnaj de, gou gamjdaengz gig vaiqvued ha!（指导老师： 罗 凤）