Youq seizcin, doenghnaz ranzmbanj gou, hai doh baenz benq baenz benq va’byaekyouzcaiq.

Ndaw doenghnanz, va’byaekyouzcaiq henj- rwgrwg, duj caenx duj, couh lumj youq gwnz dieg bu caengz gim henjrwgrwg he. Ndit daengngoenz ciuq youq gwnz va’byaekyouzcaiq, va’byaekyouzcaiq yienhndaej engq gyaeundei, engq lwenqda, engq sawj vunz maez de.

Haeuj gyawj sijsaeq yawj, miz mbangj va- byaekyouqcaiq gaenq hai caez lo, seiq dip va mbangmbit henjrwgrwg gig gyaeundei, dipva cingjcingj caezcaez humx dwk simva; miz mbangj va ngamq hai buenq he, yaek hai mbouj hai hai ok it song dip va, couh lumj dahniq launyaenq nei, ndoj youq ndaw geh mbaw; miz mbangj va lij dwg valup, baihndaw mumjgyumq daeuq ok di saekhenj he, venj youq gwn nye’byaek.

Raq rumz ndeu ci gvaqdaeuj, ci daeuj raq heiqva homfwdfwd ndeu, va’byaekyouzcaiq riengz rumz bibuengq, youq ndaw geh mbaw ndoj bae ndoj dauq, lumjnaeuz caeuq dou guh yahndoj nei, seiz raen seiz mbouj raen. Dang mwngz ndwn youq haenznaz, muengh coh giz gyae bae, daengx doenghnaz couh lumj aen haijva he.

Va’byaekyouzcaiq gyaeundei, yinx vunzlai daeuj ngonzyawj. Gyoengqvunz doxceng caeuq va- byaekyouzcaiq ingjsiengq; miz mbangj vunz youq ndaw va guh’angq, ndaw doenghnaz dauqcawq dwg sing riu, nauhyied lai lo. Daengz haemh lo, gyoengqvunz cungj mbouj sijndaej baema.

Va’byaekyouzcaiq ranzmbanj gou caen gyaeu! Gou gyaez va’byaekyouzcaiq ranzmbanj gou.

（指导教师：韦雅情）