Bi moq yaek daengz lo，daxmeh caeux couh bang gou senj ndei buhmoq lo，de youq gwnz vangj cawx hawj gou song dauq buhvaq moq，hoeng lij miz gouh haizmoq ndeu caengz ndaej cawx.

Daengz ngoenz singhgiz lo，daxmeh couh daiq gou bae haw cawx haizmoq. Daeujdaengz bouq gai haizlwgnyez，ai, haiz caen lai ha，gou yawj daengz dava bae. Gou byaengqda sijsaeq bae senj，yaep ndeu couh deng gouh haizhau najhaiz sang gyaeundei ndeu yinx gvaqbae lo. Gouh haiz neix seiqhenz dwg saek hau，cungqgyang dwg saek ndaem，gwnzde lij miz song duj vahoengz，ndeiyawj raixcaix! Gou baez sawq daenj，cingq hab din，gou gig gyaez gouh haiz neix，daxmeh couh cawx hawj gou lo.

Dauqma daengz ranz，daxmeh doiq gou naeuz，daenj haizmoq couh daibyauj yaek byaij lohmoq. Gou dingq le, sim siengj，youq bi moq neix，gou aeu engqgya roengzrengz hagsib，ceng’aeu engq ndei cingzcik.

（指导老师：王安克）