Siujyoz bizyez seiz, gyoengq doengzhag itheij iekdingh: Ngeihcib bi le youq gwnz ronghndwen doxcomz. Vihliux saedyienh aen siengjmuengh neix, gou roengzrengz doegsaw, youq guek raeuz aen dayoz mizmingz ndeu gauj ndaej bozsw yozvei le, ciepdwk youh ok guekrog bae doegsaw, hag sat le, couh bae gwnz ronghndwen cauh mbanj- ronghndwen. Ginggvaq gou caeuq daengx aen danhvei doengzdoih itheij roengzrengz, dauqdaej guh baenz aen mbanjronghndwen lo.

Seizgan gvaq ndaej caen vaiq ha, baez yaepda, ngeihcib bi gaxgonq iekdingh haenx couh daengz lo. Ngoenzhaenx, gou lij loq fangzhwnz, sing “hwnqcongz lo, bouxcawj” sawj gou daj ndaw loq fangzhwnz ndiu gvaqdaeuj, yenzlaiz dwg boux vunzgihgi heuh gou hwnqcongz lo. Gou fwt siengj daengz: Ngoenzneix dwg gyoengq doengzhag youq gwnz rongh- ndwen doxcomz, gou baenzlawz ndaej lumz ne? Gou muengz dwk swiq naj, daenj buh, gwn ngaizhaet, couh naengh hwnj feihconz mbin bae gwnz ronghndwen. Gou daeujdaengz gwnz gvangjcangz mbanjrongh- ndwen, gizneix mbwn lamz- cupcup, nywj heusausau……

Gyoengq doengzhag cungj daeujdaengz mbanjronghndwen lo. Dou mienh byaij mienh yawj, gizneix gak cungj doenghgo caeuq gwnz digiuz ityiengh, mbaw heu va hoengz, maj ndaej mwncup. Ranz gizneix mbouj sang, gojyij yawj daengz gig gyae. Gizgyae dwg naz heuloeg yawj mbouj raen henz, gizgyawj dwg raemxmboq bauq ok, sawndikndik. Diegneix caeuq gwnz digiuz miz di mbouj doengz, couhdwg gwnz mbanjronghndwen cungj dwg seizcin, dienheiq raeujrub, hoengheiq singjsien.

Gyoengq doengzhag youq ndaw fanden gwn ngaizhaemh, daihgya angqvauvau gangj ngeihcib bi daeuj gak boux guh le gijmaz, miz mbangj guh gaujguj, miz mbangj yenzgiu raemxhaij bienq damh, miz mbangj yenzgiu hawj sahmoz maj doenghgo bienq loeg…… Daihgya guhhong cungj dwg vihliux vunzloih fazcanj caeuq cinbu ha! Dou gangj dwk, riu dwk, miz vah gangj mbouj liux, miz cingz lwnh mbouj sat.

Seizgan yaepda couh gvaq- bae lo, daihgya mbouj ndaej mbouj doxbiek. Youq seiz doxbiek, daihgya caez iekdingh baezlaeng caiq doxcomz. Gou siengsaenq baezlaeng doxcomz engq miz eiqsei.

（指导老师：罗少维）