Roegyengj gyaeundei coeng- mingz, haengj gangj haengj ciengq, daihgya cungj haenh de ceiq dwg- gyaez, ceiq rox gangjvah.

Haet neix, roegyengj gag douh youq gwnz gofaex, sawqmwh raen roegvenz mbin gvaq, couh angq naeuz: “Roegvenz dahcej, raeuz caez ciengq- ciengq go ba?” Roegvenz naeuz: “Roegyengj dahnuengx, gou ganj okbae yaep ndeu, mbouj ndaej buenx mwngz guhcaemz lo.”

Fwt dwk, aen raemhngaeuz ndaem ndeu mbin gvaq, roegyengj yawjyawj, dwg roegga. Roegyengj ngamq siengj dongx, roegga gaenq mbin gyae lo. Roegyengj miz di hozndat, couh hag roegga hemq hwnjdaeuj: “A, a, a, duz roegga, a, a, a.”

Roeggacak daeuj lo, raen dwg roegyengj hag roegga hemq, couh riu naeuz: “Dwg roegyengj dahnuengx ha? Gou laihnaeuz dwg roegga bw.” Roegyengj naeuz: “Roegga daiq mbouj roxsoq lo, mbin gvaq lienz dongx hix mbouj dongx gou……Roeggacak daeggo, raeuz diuqfoux ba?” Roeg- gacak naeuz:“Gou daeuj ra roegga miz di saehcingz. Caiqraen lo, roegyengj dahnuengx!” Doq gangj doq mbin deuz lo. Roegyengj hozndat, youh hag roeggacak hemq hwnjdaeuj: “Ca ca ca ca, gijmaz ndei saeh haeuj gya? Roeggacak cij rox ra roegga!”

Mbouj miz doih, roegyengj couh swhgeij ciengq go, de yaep ndeu hag roegvenz, yaep ndeu hag roeghenj.

Boux vunzaeufwnz ndeu cingq youq laj gofaex yietnaiq, yawj ngoengq lo, dingq maez lo.

Bouxaeufwnz nyaenx mbouj ndaej doiq roegyengj gangj: “Roeg iq, mwngz ndei.”

Roegyengj hix gangj:“Mwngz ndei.”

Bouxaeufwnz gig doeksaet:“Vah gou mwngz hix rox?”

Roegyengj gangj:“Hix rox, hix rox.”

Bouxaeufwnz angq dangqmaz. De gaeb duz non ndeu cuengq gwnz mbawfaex bae, hawj roegyengj gwn.

Yienghneix, baez it seng, baez ngeih sug, roegyengj caeuq boux vunz neix sug lo. Doeklaeng, bouxaeufwnz daiq roegyengj ma ranz, son roegyengj rox gangj haujlai vah.

Ngoenz ndeu, bouxaeufwnz daiq roegyengj bae camgya doxdax gangj- vah.

Bouxaeufwnz dawz roegyengj cuengq ndaw roengqroeg bae, youq gwnz roengq goemq fan baengzndaem ndeu, daeujdaengz aenciengz doxdax. Bouxaeufwnz raen miz haujlai roeg- yengj, gag danq naeuz: “Hai, baenzlai roegyengj!”

Hwnj ciengz lo, bouxaeufwnz baez biengj fan baengz goemq, roegyengj yawjyawj seiqlengq, danq naeuz:“Hai, baenzlai roegyengj!” Daengx ciengz cungj haenhndei. Roegyengj ndaej daih’it mingz lo.

Boux vunzfouq ndeu ok haujlai ngaenz cawx roegyengj baema lo.

Gvaq geij ngoenz, bouxcawj moq cingj hek. De siengj hawj roegyengj doiq gyoengq hek gangj:“Hai! Baenzlai hek!” Mboujliuh, baez biengj baengz goemq, roegyengj couh danq:“Hai! Baenzlai roegyengj!”

Daengx ciengz riuhaha. Roeg- yengj angqvauvau.

Bouxcawj gig saetnaj, ndaq roegyengj:“Mwngz duz raq neix!” Roegyengj swenj naeuz:“Mwngz duz raq neix! Mwngz duz raq neix!”

Bouxcawj hozndat naeuz:“Yaep ndeu mwngz couh dai!” Roegyengj hix hozndat naeuz:“Yaep ndeu mwngz couh dai! Yaep ndeu mwngz couh dai!”

Bouxcawj huj dwk fad aen roengq, sej roengq sanq lo, roegyengj hwk ndaej “ha” sing ndeu, bulu mbin deuz lo.

Gyoengq hek naeuz:“Roegyengj cij rox rw bak, gaenbonj mbouj rox gangjvah!”

(Ganh Sozvwnz/甘说文)

鹦鹉学舌