Gyoengqvunz cungj ciengq: “Gwnzbiengz cijmiz daxmeh ndei, lwgnyez miz meh lumj gaiq bauj, ndonj haeuj ndaw rungj daxmeh bae, vuenyungz lai dangqmaz.” Gou cix mbouj doengz, gou cix ciengq: “Gwnzbiengz cijmiz mehbaj ndei, lwgnyez miz baj lumj gaiq bauj, ndonj haeuj ndaw rungj mehbaj bae, vuenyungz lai dangqmaz.”

Daxmeh gou daengx bi youq rog dajgoeng, daj gou rox saeh hwnj, mehbaj couh lumj daxmeh yienghhaenx ciuqgoq gou. Moix ngoenz hai da yawjraen, dwg fajfwngz mehbaj yaeng’yaeng lumh aennaj gou, gyanghwnz siengj daxmeh, siengj daengz daej lo, dwg youq ndaw rungj mehbaj ninzndaek. Geiq ndaej bae youwzyenz doegsaw seiz, daegbied dwg seiznit, mehbaj moix ngoenz cungj yungh ciendamj bau gou ndaet bae, yungh aenndang nyieg de, aemq gou bae hagdangz. Daj bae youwzyenz daengz siujyoz it nienzgaep, cungj dwg mehbaj soengq gou ciep gou.

Bi’gvaq ndwencieng, daxmeh ma ranz lo, couh youq gou caeuq daxmeh guhcaemz ndaej gig angq seiz, cainanh daj gwnzmbwn roengzdaeuj, aenvih gou saetdiuq, bungq deng aenhuz raemxgoenj gwnz daiz, gij raemxgoenj ndaw huz, bienbien boek youq gwnz din gou, log ndaej gou daejnga’nga hwnjdaeuj, daxmeh mbouj rox baenz- lawz guh, dinfwngz luenh caez. Mehbaj dingqnyi le, ganjgip buet gvaqdaeuj, mbouj gangj saek gawq vah youh buet hwnj gwnz laeuz bae, gwed daeuj aen namzgva he, gou cingq siengj hemq, din gou deng log lo, mwngz gwed namzgva daeuj guh gijmaz? Cij raen mehbaj aeu fagcax daeuj, bag hai namzgva, yungh nyaqsim namzgva oep youq gwnz din deng log gou. Mehbaj yienghneix oep, din gou couh sikhaek mbouj in lo, gij sing daej gou hix ciemhciemh iq lo. Doeklaeng, mehbaj youh aemq gou bae yihyen, daengz yihyenz, canghyw naeuz, mwngz yienghneix guh gig ndei, ndaej sawj giz logsieng bienq liengz, hoeng, lij aeu youq ndaw yihyen yw cij ndaej.

Ndwencieng baez gvaq, daxmeh youh bae dajgoeng lo, Youq ndaw yihyen, mehbaj moix ngoenz yunghsim ciuqgoq gou. Din gou ndei lo, mehbaj hix byom bae gien ndeu lo, gou got ndaet mehbaj naeuz: “Gou majhung le, itdingh hauqswnh mwngz.” Mehbaj doiq gou naeuz:“Mwngz dwg lwg mehbaj.”

Mehbaj, gou gyaez mwngz, mwngz couhdwg “daxmeh” gou.

（指导老师：莫秋菊）