Youq ndaw hanzgyaj, gou hag rox haujlai bonjsaeh, ndawde hag gwih danci gienh saeh neix hawj gou ceiq nanzlumz.

Youq ndaw hanzgyaj, miz ngoenz ndeu, gou cam daeggo: “Daeggo, mwngz gojyij son gou hag gwih danci lwi?” Daeggo naeuz:“Ndaej ha!” Gou dingq le, angq dwk diuq hwnjdaeuj. Daeggo daj ndaw ranz rag danci okdaeuj, doq byaij doq doiq gou naeuz:“Danghnaeuz gyaeujci nyeng gvaq baihgvaz, mwngz couh dawz gyaeujci niuj gvaq baihswix; danghnaeuz gyaeujci nyeng gvaq baihswix, mwngz couh dawz gyaeujci niuj gvaq baihgvaz, rox lwi?” Gou ngaekngaek gyaeuj naeuz: “Rox lo.” Gangj sat, gou couh gwih hwnj danci bae. Hoeng, danci mbouj dingq gou cijveih, gyaeujci niuj bae niuj dauq, gou simgip raixcaix. Sawqmwh, gou siengj daengz gij vah daeggo, couh ciuq gij vah daeggo bae guh, hoeng ngamq gwih yaep ndeu youh laemx lo. Gou ndatheiq dwk naeuz: “Hag danci baenzneix hoj, gou mbouj hag lo.” Daeggo gujli gou naeuz:“Daegnuengx, gaej doeknaiq, menhmenh hag, gou siengsaenq mwngz itdingh hag rox.” Dingq gij vah daeggo le, gou youh miz saenqsim lo, youh gwih hwnj danci bae hag. Ginggvaq duenh seizgan ndeu hag, gou hag rox gwih danci lo.

Yienznaeuz hag gwih danci gig mbouj yungzheih, hoeng, hix gig mizyinx, de hawj gou roxdaengz cijaeu haengj hag haengj guh, gijmaz saeh cungj hag ndaej rox, guh ndaej baenz.

（指导老师： 罗 凤）