Gvaq bi moq gou youh maj hung bi ndeu lo, bingzseiz daxmeh guh hongranz sinhoj lai, youq ndaw gyajgiz gou gietdingh gaen daxmeh hag guh hongranz.

Aenvih gou gig gyaez gwn gyaeqgaeq, ndigah gou couh sien hag cien gyaeqgaeq. Gou sien dawz gyaeqgaeq youq henz bak duix menhmenh dub song mbat, yienzhaeuh dawz gyaeqgaeq cuengq roengz aen vanj bae, dwk di gyu roengzbae hoed yungz. Daxmeh bang gou hai feiz, caj rek hoengzndat le, hai feiz iq, yienzhaeuh cuengq di youz roengz rek bae, ndaw rek youz ok hoenz, gou miz di vueng, fwngz saenzdedded dawz gyaeqgaeq ndingq roengz ndaw rek bae, ndaw rek lumj cuengq bauq nei “bili bala” yiengj dwk. Gyaeq- gaeq gig vaiq couh giet baenz gep, gou dawz gucanj fan gyaeq gvaqdaeuj, mbouj yaep he couh bienq henj lo. “Cien baenz lo!” Gou sikhaek dawz gyaeq daek okdaeuj. Yawjraen gyaeqgaeq cien ndaej henjrwgrwg homfwd- fwd, ndawsim gou gig gikdoengh. Neix dwg gou baez daih’it cien gyaeqgaeq ha. Gou gaenjgip dawz dawh nip gaiq ndeu hawj daxmeh cimz, daxmeh cimz le haenh naeuz:“A！ caen hom, caen ndei gwn.” Gou doiq daxmeh naeuz:“Baezlaeng ranz raeuz cien gyaeqgaeq, louz hawj gou cien couh ndaej lo.”

Ngoenzneix gou gig angq, aenvih gou hag rox cien gyaeq- gaeq lo. （指导老师：黎才新）