Ngoenz ndeu, miz vunz cingj daxgoeng caeuq gou bae bouqhaeux gwnz gai gwnngaiz, gou angq dwk youh diuq youh ciengq gaen daxgoeng caez bae. Youq gwnz loh ginggvaq aen ndoengfaex iq seiz, daxgoeng dingz roengzdaeuj, muengh ndaw ndoeng- faex, lumj miz gijmaz simsaeh nei. Gou ngeizvaeg lo, haxbaenh daxgoeng lij miz gangj miz riu, seizneix saeknaj de baenzlawz yienghneix doeknaiq mbouj gangj vah lone?

Gou nyaenx mbouj ndaej byaij gvaqbae, beng buh daxgoeng cam: “Daxgoeng, daxgoeng, baenzlawz lij mbouj byaij ha? Ndwn youq gizneix guh gijmaz?” Daxgoeng danqheiq naeuz: “Ai, gaxgonq gizneix dauqcawq cungj dingqnyi sing roeg, seizneix cungj mbouj dingqnyi saek sing roeg heuh lo.” Gou mbouj naihfanz dwk gangj:“Raeuz vaiq byaij ba, mbouj guenj de lo.” Daxgoeng fouznaih, cijndei yamqdin naekgywd, ngaem- gyaeuj mbouj gangj vah byaij lo.

Youq ndaw bouqhaeux, fuz- vuyenz dawz haeuxbyaek daeuj. Gou baez yawj, gij byaek neix itdingh ndei gwn! Ngah ndaej gou raemxmyaiz cungj rih okdaeuj lo. Fuzvuyenz gaisau gij byaek neix hawj dou nyi: “Neix dwg aeuq raet roeggacak、neix dwg hojgoh roeglaej、neix dwg youzcaq roeghenj iq……”

Daxgoeng baez dingq, coenz vah ndeu cungj mbouj gangj couh rag gou byaij ok baihrog bae, gou gip lo, couh beng buh daxgoeng cam:“Daxgoeng, gij haeuxngaiz yienghneix ndei gwn, vih gijmaz mbouj gwn ne?” Daxgoeng gangj: “Gij roeg neix bonjlaiz wng- gai youq ndaw ndoengfaex swnghhoz ndaej gig ndei, hojsik gaenq bienqbaenz gijgwn vunzraeuz lo. Baenzlawz mbouj hawj vunz sim’in ne?” Fuzvuyenz lienzmuengz gej naeuz: “Daxgoeng , mwngz siengj loek lo, gij roeg neix cungj dwg vunz ciengx, mbouj dwg youq ndaw ndoengfaex gaeb ndaej.” Dingq fuzvuyenz gangj le, daxgoeng youh gangj: “Gij roeg neix mbouj dwg daj ndaw ndoengfaex gaeb ma, gij roeg ndaw ndoengfaex youh bae gizlawz lone?”

Vihliux gej aen vwndiz daxgoeng, gou cazyawj swhliu rox lo. Cungjloih duzroeg gemjnoix cujyau dwg swyenz vanzging deng buqvaih, caeuq gyoengqvunz luenh gaeb luenh gaj cauxbaenz. Yaek baujhu doenghduz, raeuz mboujdanh aeu guenj ndei aenbak swhgeij, caemhcaiq baujhu ndei sadan、ndoengfaex、doengh- naz…… Hawj duzroeg swyouz swngh- hoz, duzroeg miz nanh seiz, raeuz aeu bang de, bang gyoengqde guh rongz; yawjraen miz vunz gaeb duzroeg seiz, raeuz aeu bang duzroeg mbin haeuj ndaw daswyenz bae……

Caezsim roengzrengz ba, hawj bya engq heu, raemx engq saw, hawj duzroeg youq ndaw ndoeng ciengqgo, hawj byalwg youq ndaw dah youzraemx.

（指导老师：覃玉往）