Veiz Gozcingh dwg boux canghhag hongbing, doiq gij swhsiengj canloz Mauz Cwzdungh “yinx dig haeujlaeg, gven dou moeb duzma” haenx, miz dijvei gig laeg, caemhcaiq miz gvaq gingniemh sizcenj. De naeuz gvaq, danghnaeuz Meijdigozcujyi daj Yeznanz haeujfamh guek raeuz, bietaeu nei raeuz cix nyiengh mbangj dieg okdaeuj gonq, yinx dig haeujlaeg, liux le youq mwh habdangq, giz habdangq caeuq vunzdig guh baenq- cienq, doeklaeng siumied gyoengq- de. Seizhaenx, cunghyangh rox guh anbaiz, aeu fugcoengz cunghyangh, hoeng aeu miz gij bwh gonq, aeu ciuq gij saehsaed Guengjsae bae guh gij baijbouh hab’wngq.

Bi 1965 nienzco, Veiz Gozcingh doiq boux suhgi siveij ngamq daj Liujcouh diuh daengz Namzningz haenx Siuh Hanz naeuz: “Diuh mwngz daeuj Namzningz guh hong caeuq Liujcouh mbouj doxdoengz, Namz- ningz miz sam gienh saehcingz aeu daegbied guh ndei bae: Daih it dwg ca ndei nungzyez, bwh ndei daenz ndei haeuxgwn, rom haeux baengh lwgminz, baujcingq bingmax hoenx- ciengq ndaej haeux gwn; daih ngeih dwg gij dieg byandoq ndoindoq hab ndaem faex haenx yaek aeu ndaem gofaex, yienghneix hoenxciengq le ndei yondang, fuengbienh hoenx youzgiz, couhsuenq yenzswjdan nyingz gvaqdaeuj, caemh ndaej gemjmenh langhcung caeuq yenzswj fuzse; daih sam dwg guh ndei hong yungjginh youhsuz, bingdoih daezok iugouz, yaek caenhrengz bae banh, caenhvaiq banh ndei.

Mwh Meijgoz ciemqhoenx Yez- nanz ndaej caenh’itbouh bienq ak caemhcaiq haep deng aencienz guek raeuz haenx, Veiz Gozcingh lai baez bae daengz dieg henzbien caeuq diegbya baihsaebaek Guengjsae ngonzcaz, diemjcaz gij cingzgvang bwhhoenx caeuq guh “sam sienq” haenx. Miz baez ndeu, de caeuq gij vunzgaemhong Cinz Yinggih、Liuz Cunggvei、Ho Vanvaz daengj vunz, ngonzcaz Majsanh、Duh’anh、Bahmaj、Doenglanz daengj diegbya, yawjraen aen gunghcwngz bwhhoenx bingdoih guh haenx, gaenq dwk doeng diuz roencongh ndeu, cingq gaenjcieng vat doeng diuz roencongh daihngeih dwk, de gig angq. De naeuz gij goengdaeuz bingdoih: Ndaej gaij ngoenz sam ban guh hong baenz seiq ban guh hong, haidoeng song aen bakcongh gonq, liuxle haenq vat aen daihsam; yaek aeu son goq gisuz hawj bouxbing, youq gij goekdaej baujcingq ancienz、bauj- cingq cizlieng haenx gwnzde gouz vaiq; aeu caeuq vunzlai bonjdieg guh ndaej baedauq, bang gyoengqde guh ndei swnghcanj.

(caengz sat)