Gwnzhaw boux bae boux dauq ndaetfoedfoed, Aunuk youq gyang vunz lai byaij dwk, caih vunz hemq gai hemq cawx, de cungj mbouj leixlangh.

Baihlaeng Aunuk haemq gyae haenx, miz boux vunzvaih ndeu cingq duet aen daeh boux mehmbwk ndeu. Mehmbwk daihsing hemq: “Gouqmingh ha, miz vunz bokloh lo……”

Aunuk dingq mbouj nyi, ciuq- yiengh byaij faenh de.

Vunz gwnzhaw dingq ndaej nyi, hoeng, mbouj miz byawz gamj daeuj bang mehmbwk haenx.

“Byawz bang gou lanz dawz aen daeh dauq hawj gou, gou hawj de 1000 maenz!” Mehmbwk itmienh gyaep itmienh hemq.

Aunuk dingq mbouj nyi, ciuq yiengh byaij faenh de.

Vunz gwnzhaw dingq ndaej nyi, hoeng, mbouj miz byawz gamj bae bang mehmbwk lanz bouxcaeg haenx.

“Byawz bang gou lanz dawz aen daeh dauq hawj gou, gou hawj de 2000 maenz!” Mehmbwk doq gyaep doq hemq mbouj dingz.

Aunuk dingq mbouj nyi, ciuq- yiengh byaij faenh de.

Vunz gwnzhaw dingq ndaej nyi, hoeng, lij mbouj miz byawz gamj bae bang mehmbwk lanz bouxcaeg.

“Byawz bang gou lanz dawz aen daeh dauq hawj gou, gou hawj de 4000 maenz!” Mehmbwk song fwngz cengj hwet, rau heiq fofo, nyinhnaeuz mbouj miz muengh lo.

Aunuk dingq mbouj nyi, ciuq- yiengh byaij faenh de.

Vunz gwnzhaw dingq ndaej nyi, hoeng, lij mbouj miz byawz gamj bae lanz bouxcaeg haenx.

Cingq youq seizneix, ndaek vunzvaih buekmingh buet deuz haenx, fwt bungq deng Aunuk. Aunuk soemxsax mbat ndeu, de cabmax ndwn dingh le, yiet fwngz gvaqbae nyaeu dawz hozndoenj ndaek vunzvaih haenx, daihsing hemq naeuz: “Mwngz guh gijmaz?”

Ndaek vunzvaih sim baez saenz, fwt cuengq aendaeh ndaw fwngz roengz gwnznamh, cengq hai fwngz Aunuk, vaiqvid buet deuz lo.

Mehmbwk daeuj daengz henz Aunuk, dawz aen daeh gvaqdaeuj, daj ndaw daeh mbon ok dab ngaenz ndeu ndenq hawj Aunuk, naeuz: “Lauxgo, docih mwngz lo, danghnaeuz mbouj miz mwngz gaemhdawz ndaek vunzvaih haenx, aendaeh gou couh nanz ndaej dawz dauq lo, gij ngaenz neix dwg gou bauqdap mwngz.”

Aunuk cim coh mehmbwk da ndeu, hix mbouj ciep aeu ngaenz, riunyumnyum byaij deuz lo.

Gyoengqvunz humx yawj haenx mbouj miz byawz rox de dwg bouxnuk.