Sai: Ngoenzneix gou Daegcuengh，

Raen dahnuengx doengzban;

Dawz liemz youh dawz hanz，

Cam mwngz dwk lawz mbaq？

Mbwk: Seizdoeng rumzbaek nit,

Bae aeu fwnz bikfeiz;

Mij lumj mwngz baenzndei,

Miz seizgan daeuj langh.

Sai: Beix mbouj dwg daeuj langh,

Hix ngamj bae aeu fwnz;

Raen doengzban saulwnz，

Siengj nem mwngz caez byaij.

Mbwk: Caenh’aeu mwngz caensim,

Siengj gyaucingz yungzheih;

Langh beix miz gyaleix,

Cix gaej mbaet va vunz.

Sai: Raen mwngz nuengx baenzgvai,

Caenh siengj ai caemh liengj;

Beix ndangdog dwg dingh，

Aensim cingq gvaqmaz.

Mbwk: Beix aensim baenzsoh,

Ok loh mbouj dan gou;

Gouj fuj cib sam cou,

Gvai gvaq gou daihbaj.

Sai: Langh nuengx caemh ndangdog,

Cix gaej log beix sim;

Guhdoih gaq giuzrin,

Ndaej diem din caez byaij.

Mbwk: Roeg ra doih caux rongz,

Gyuk haeuj ndoeng caca;

Aen nuengx seng ndoi laj,

Caengz raen mbaj ciuz va.

Sai: Nuengx ha sim gaej gaep,

Mbwn laep cij diemj daeng;

Saedceij ndei caengz daengz,

Ngoenzlaeng raeuz menh angq.

Mbwk:Ndaw ndoeng song roeggae,

Caemh mbin bae doiqnaj;

Vavengj hai gwnz cah,

Muengh rwi mbaj daeuj ciuz.

Sai: Mwngz nem gou Daegcuengh,

Beix dog nuengx hix dan;

Dwk rap caemh diuz hanz,

Saedcaih ngamj lailai.

Mbwk: Duzvaiz maij duzvaiz,

Caengz anbaiz caemh riengh;

Beix siengj nuengx hix siengj,

Lau vunz ciengq hanzvah.

Sai: Caenhaeu raeuz caezsim,

Feiz yungz gim mbouj bienq;

Hanzvah caih vunz ciengq,

Cim caeuq sienq doxlienz.

Mbwk:Siengj heuh mwngz daeggo,

Ciuqgoq nuengx baenz vunz;

Daek vanj haeux doengz gwn,

Caemh gaem fwngz caez byaij.

Sai: Ranz Daegcuengh caemh hoj,

Hix dwg ndoq dangqmaz;

Bogut nem bohaz,

Ngamj ndaej ha song gyaeuj.

Mbwk: Langhnaeuz caen baenzndei,

Bae aeu fwnz dawz gut;

Beix gvej nuengx guh cug,

Cib cuk maenh youh gvai.

Sai: Song bofwnz doengzbingz,

Raeuz hix ging baenzhab;

Nuengx cug beix guh rap,

Caez dab giuj baema.

Mbwk: Dwk fwnzrem byoq feiz,

Dawz ndaej hoengh youh raeuj;

Caemh naengh fwnz song gyaeuj,

Raeuz menh daeuj damzcingz.

Caez: Raeuz doxgyaez guhdoih,

Lumj doengz doiq vazmeiz;

Baenzseiq mbouj doxleiz(liz),

Cib cuk ndei daengz laux.