Youq ngoenznaengz swnghhoz ndawde, nyeziq nanz mbouj nanz cungj rox loengh ok mbangj sieng in roxnaeuz baenz di bingh mbaeu he, danghnaeuz bohmeh cawqleix ndaej ngamj, cix doiq nyeziq ndangdaej gengangh fouz ngaih.

1、Ok hanhheu: Nyeziq ndang- nyieg ciengzciengz ok hanhheu, mboujlwnh gyangngoenz hozdung roxnaeuz gyanghaemh haeujninz cungj hanh dumz ndang liux. Mwhhaenx, aeu haeujsim yingzyangj nyeziq, demgiengz ndangrengz duhde, ndaej hawj de gwn gij yw baihlaj neix: Gij nyeziq gyangngoenz ok hanh haenx, ndaej aeu vangzgiz、bwzsuz、fangz- fungh gak 90 gwz, ngenz mienz, moix baez aeu raemxgoenj soengq gwn 6 gwz, haethaemh gak baez ndeu, lienzdaemh gwn ndwen ndeu; boux gyanghwnz ok hanhheu haenx ndaej gwn cihbwz divangzvanz(知柏地黄丸).

2、Haexgaz: Lai hawj de gwn byaekheu、lwgmak, caemhcaiq lai gwn raemx, lai ok rog bae lienhndang. Naengh geij ngoenz mbouj okhaex, ndaej naenx genj luenz raez baenz ndaek saek haeuj conghhaex de bae; hix ndaej aeu 30 gwz dangzrwi heuz 100 hauzswngh raemxgoenjliengz, dwk 2 gwz gyu le baez dog gwn liux.

3、Gywnj conh: Aeu ceij- veiswngh unq lai luep haenx ma rwed di youzgwn he hwnjbae, daiz donh saejgyoenj hwnj yaengyaeng oet haeuj ndaw conghhaex bae, doeklaeng hawj nyeziq sousuk conghhaex, caemhcaiq hawj de ninz gwnz mbonq yietnaiq yaep ndeu. Gij nyeziq ciengzseiz baenz gywnj conh aeu haeujsim conghhaex veiswngh, gaenx rieg vaqndaw, baujciz okhaex doengswnh, ndaej gwn bujcungh yizgivanz duenh seizgan he(moix baez 6 naed, haethaemh gak gwn baez ndeu).

4、Nyungz haeb non rad: Gaej gaeu humz, ndaej aeu cinghliengzyouz daeuj led gizde. Naengh mbangjgiz hwnj nwnj gawh nding, ndaej aeu 5 naed luzsinzvanz ngenz mienz, gyaux cinghliengzyouz le led gizde.

5、Coemh sieng log sieng: Baez deng coemh sieng roxnaeuz log sieng, doq sikhaek yungh meiqgwn roxnaeuz raemxcaz gyoet led gizde, caiq yungh raemxhing cat; aeu beuzgeng begdangz he yungz youq ndaw raemxgoenjliengz cat gizde, ngoenz geij baez; youqgaenj seiz aeu sikhaek soengq bae yihyen genjcaz aeu yw.