Riengzdwk mbwn ciemh ngoenz ciemh ndat, Cungzging siminz cungj okyienh miz conghndaeng insep、 huzgizdau deng ganjyenj、baenz binghdoegsingq dwgliengz daengj yienghsiengq. Vihneix, canghyw daezsingj naeuz, gij binghdoeg neix dingzlai dwg daj conghndaeng haeuj daengz ndaw ndang bae, mbwn ndat seiz daegbied aeu haeujsim bingh daj conghndaeng haeuj, ceiq cujyau dwg baujciz conghndaeng seuqsak caeuq dumznyinh.

Canghyw gaisau naeuz, geij cungj binghdoeg gwnzneix, miz 80% dwg aenvih conghndaeng mbouj guh ndei baujgen yinxhwnj. Daegbied dwg seiz ndat, conghndaeng ciengz dwg hawqsauj, yungzheih rom miz faenx le yinxhwnj sailwed mbehai、insep、ok lwed daengj binghyiengh, ndigah, baujciz conghndaeng seuqsak caeuq hawqsauj daegbied youqgaenj.

Ndaw ranz wng caenhliengh baujciz itdingh hoengheiq mbaeqdoh; bingzseiz gaej luenh raed bwnndaeng roxnaeuz yungh lwgfwngz uq yaek conghndaeng, fuengz nemmuek ndaw conghndaeng ganjyenj; haethaemh swiq naj seiz ceiq ndei yungh gaen yub raemxndat goemq conghndaeng diemheiq geij faen cung, roxnaeuz cigciep yungh raemxgyoet cingswiq conghndaeng, baujciz conghndaeng dumznyinh. Linghvaih, vih cing swiq gij nengzbingh caeuq huqcab ndaw conghndaeng ok seuq, ndaej yungh ywsengleix byoq haeuj conghndaeng bae, haethaemh cingswiq congh- ndaeng baez ndeu.