Seizcin, ngoenz ndeu, doiq roeg- gacak ndeu daj giz gyae mbin daeuj ndaw ndoeng iq rog mbanj. Songde dajsuenq youq gizneix youq roengzdaeuj.

Noucim dingqnyi roeggacak heuh cici cetcet, yawjraen gyoengqde riengjret mbin bae mbin dauq, angq raixcaix, sim ngeix:“Baez neix gou dauqdaej miz ranznden lo, moix ngoenz cungj ndaej dingq gyoengqde ciengq go ndei dingq lo.”

Roeggacak genj gofaex ceiq hung ceiq sang ndeu, youq nye faex ceiq sang haenx, hainduj caux rongz lo, gyoengqde dajsuenq seizhah couh youq gizneix faeg gyaeq ciengx lwg.

Noucim youq ndaw congh laj gofaex rox le, doeksaetyat, mbeihung dwk gvaqdaeuj lwnh roeggacak, gangj:“Go faex neix mbouj dwg giz ancienz ndeu ne, gij rag de yaek naeuh caez lo, seizlawz cungj yaek laemx roengzdaeuj, yungyiemj raixcaix, sou ceiq ndei gaej youq gizneix caux rongz.”

Duz roeggacak ndeu naeuz:“Hw, caen gvaiq lai lo！Roeggacak dwg conh- gyah caux rongz, dauq aeu dingq duz noucim ndeu gangj.” Lingh duz roeggacak hix naeuz:“Mwngz ngoenz- naengz cungj ndoj ndaw congh, da nou feuzfed, rox gijmaz? Nanzdauh mwngz mbouj nyinh gij bonjsaeh roeggacak ma? Duz dairaq neix, dauq gamj daeuj guenj conhgyah guh saehcingz!”

Roeggacak mbouj caeuq noucim caiq loso, de yawj mbouj hwnj noucim, engq mbouj saenq noucim gangj. Gyoengqde sikhaek doenghfwngz caux rongz, ngoenz aenrongz guh baenz haenx couh sikhaek buen haeujbae youq lo.

Nyaengq ndaej mboengq ndeu, yienghyiengh cungj swnh, roeggacak byoeng lwg lo, duzduz cungj dwggyaez raixcaix, daengx ranz gvaq gij saedceij gig vuenyungz.

Hoeng, miz ngoenz ndeu, daeng- ngoenz ngamq swng hwnjdaeuj, roeggacak ciuq ngoenznaengz ityiengh, angqvauvau bae ra gwn, songde cingq daiq gijgwn mbin dauqma. Seizneix, gyoengqde yawjraen gofaex aenrongz swhgeij youq haenx gaenq laemx roengz lo, aenrongz deng dimz vaih lo, roeglwg cungj dai liux lo.

Roeggacak simcieg dangqmaz, gyoengqde ra raen noucim, daejsubsub gangj: “Camj lai lo! Dou mbouj dingq vah mwngz, deng fad naek lo. Dou mbouj siengj daengz gij vah mwngz dwg baenzneix deng.”

Noucim han naeuz:“Aenvih sou yawj mbouj hwnj gou. Sou hix mbouj siengjsiengj, gou youq laj deih, depgyawj rag gofaex, rag gofaex ndei roxnaeuz naeuh, gou ceiq cingcuj lo.”

Roeggacak caiq hix mbouj gamj yawj mbouj hwnj duz noucim iqet youq lajdeih lo. Songde cam noucim go faex lawz goek laeg youh maenh, youh youq gwnz go faex sang ndeu caux rongz lo. Roeggacak caeuq noucim doxbang dox- gingq, baenz baengzyoux ndei lo.

(Ganh Sozvwnz/甘说文bienhoiz)