Goengda gvaqseiq lo, gou gig siengjniemh de! Geij ngoenz neix aennaj riunyumj goengda cungj mbouj dingz yienh youq ndaw ukgyaeuj gou, haujlai saeh gonq hix youq ndaw uk gou mbouj dingz yienh okdaeuj lo.

Aenvih daxmeh ndangnyieg bingh lai, gyahwnj gou caeuq dahcej doegsaw yungh cienz lai, ndaw ranz gwndaenj cungj gig hoj. Gou seiziq cungj muengh goengda daeuj ranz gou guhhek. Aenvih goengda daeuj le couh miz bingj gwn! Goengda moix baez daeuj cungj cawx daeuj doengz bingj ndeu, gou caeuq dahcej moix vunz gaem aen bingj ndeu humx youq henz ndang goengda, riz aenbingj riz bae riz dauq sij mbouj ndaej gwn saek amq. Daxmeh aeu bingj yo hwnjdaeuj, caj daengz dou biujyienh ndei seiz cij ciengj hawj dou aen ndeu, ndigah doengz bingj gwn ndaej haujlai ngoenz! Miz seiz, gou bae caeg gwn gij bingj daxmeh yo haenx, ndawsim siengj: Caj gou aeu bingj gwn sat le, gou couh raen goengda lo.

Seiziq goengda daegbied ndiepgyaez gou caeuq dahcej, goengda baez daengz ranz gou, yawjraen gwnz ciengz nem rim gij ciengj dou, de cungj yawj bae yawj dauq, yienhndaej gig angq. Ndwencieng, goengda ceiq haisim lo, dou geij beixnuengx comz youq itheij, miz gangj miz riu, nauhyied raixcaix, goengda cij ndwn youq henz vuenyungz dwk yawj dou. Dou hix miz seiz andingh, haenx dwg goengda heuh dou haihoih, de naeuz: Sou aeu doxgiet, aeu doxbang, daeggo dahcej aeu guh yiengh ndei hawj daegnuengx dahnuengx yawj. Yienznaeuz ngamq geij coenz vah, hoeng hawj dou souh’ik gig lai.

Ngoenzneix, yienznaeuz goengda biek dou bae lo, hoeng de itcig lij lix youq ndawsim dou. Dou geiqniemh gij gyaez de! Geiq- niemh gij najriu raeujrub de! Engq geiqmaenh gij dauhleix goengda son dou guh vunz haenx !

（指导老师： 刘新旋）