2015 nienz 4 nyied 20 hauh, gou camgya Daengx Yienh Daihsam Gaiq Sam Nyied Sam Hagseng Doxdax Eu Fwen, gou youh gikdoengh youh gaenjcieng. Gaenjcieng dwg aenvih gou caengz camgya gvaq daengx yienh doxdax eu fwen, lau eu mbouj ndei, ndigah mizdi gaenjcieng. Hoeng, ndaej camgya cungj hozdung neix, mboujguenj eu ndaej ndei mbouj ndei, cungj ndaej lienh swhgeij, gou siengj daengz neix youh gig gikdoengh.

Eu fwen doxdax faen song ngoenz gawjhengz, ngoenz daih’it dwg cosaiq, ngoenz daihngeih dwg gietsaiq. Ngoenz daih’it eu ndaej ndei couh ndaej haeuj gietsaiq.

Ngoenz daih’it, youq giz hoihciengz doxdax eu fwen, vunz cien vunz fanh, miz senjsouj camgya doxdax、miz bingzveij lauxsae、miz bohmeh hagseng caeuq gyoengq doengzhag, lij miz haujlai bouxlaux bouxcoz bouxsai mehmbwk daj gak dieg comz daeuj, gou gig vaiq couh yungz haeuj cungj heiq angqyangz neix bae.

Lajbyonghngoenz song diemj buenq cung, boux cujciz senhbu doxdax hainduj lo. Sien hawj haj boux hagseng eu sam hot fwen couxhek, gyoengqde eu ndaej gig ndei, laj daiz vunzlai bekfwngz goksasa.

Ciepdwk couh doxdax eu fwen lo. Gyoengqde miz mbangj eu ndaej gig ndei, fwen ndei sing gok ndeidingq raixcaix. Miz hot fwen ndeu gou geiq ndaej gig maenh: “Docih raeuz lauxsae, sim ndei baenz bohmeh, son sij cih son veh, gaeqmeh bienq funghvuengz.” Hoeng hix miz mbangj vunz eu ndaej mbouj ndei geijlai, mbeiiq, sing daemq, simvueng lumz swz. Lwnz daengz gou hwnj daiz eu fwen lo, ciuq lauxsae gaxgonq son gou haenx, gou daihdaih fuengfueng byaij hwnj gwnz daiz bae. Hoeng ndwn youq gwnz daiz, yawjraen lwgda bingzveij lauxsae cimyawj gou, ndawsim gou roxnyinh gaenj lai lo, sim diuqbubbub, lumjbaenz cungj yaek diuq hwnj conghhoz daeuj, angjfwngz hix miz hanh conh okdaeuj lo. Yaepyet lumz hot fwen gou yaek eu haenx lo. Seizneix, Banh lauxsae yawjraen gou dwg yienghneix gaenj, couh yaengx mehfwngz hwnjdaeuj, lwgda lumj cingq gangj: “Gaej lau, aeu doiq swhgeij miz saenqsim, mwngz dwg boux lwgnyez ak ndeu.” Yawjraen lwgda unqswnh caeuq gujli lauxsae, aensim gou cugciemh dingh roengzdaeuj. Gou sup gaemz heiq raez ndeu, dawz song hot fwen eu sat, laj daiz yiengj hwnj sing bekfwngz goksasa. Aenvih gou eu ndaej ndei, ndaej haeuj ngoenz daihngeih gietsaiq, gou sim- angq raixcaix, Banh lauxsae hix vih gou sim- angq. Geij ngoenz daeuj, gou lienh ciengq go lienh dwk hozhep bae, ngoenzneix ndaej yienghneix cingzcik, raemxhanh cungj suenq mbouj begbeg lae.

Baez doxdax eu fwen neix, yienznaeuz gou cij ndaej daihsam mingz, hoeng gou gig angq, aenvih gou daj ndaw gyoengq doengzhag wnq biujyienh hag ndaej doxgaiq gig lai, gou itdingh hagsib gyoengqde, ndeindei bae hag Sawcuengh, baezlaeng gou biujyienh itdingh engq ndei.

（指导老师：班珠莲）