Gwn caz seiqgeiq mbouj doxdoengz, vunz ciengz gangj:“Seizhah gwn cazloeg, seizdoeng gwn caznding, bi daengz byai ndaej gwn cazvuhlungz.” Cazloeg feih haemz, mbouj hab mehmbwk caeuq boux dungx caep gwn; caznding feih van singq raeuj, seizhah gwn yungzheih hwnjhuj, cazvuhlungz cix mbouj van mbouj haemz, mbouj caep mbouj ndat doengzseiz ndaej giep huj gaij ndat.

Gemjbiz cix gwn cazvuh- lungz. Gijgwn seizhah hab gwn cit, gijgwn youznywnx ndaej boiq gwn di caz he. Cazvuhlungz mboujdanh ndei gwn, caemhcaiq ndaej meijyungz. Gij cazdohfwnh ndaw cazvuhlungz ndaej sup aeu youzlauz baiz ok rog ndang daeuj, lij ndaej faengaij youzlauz dem. Miz soqgawq ndaej rox, gwn 300 hauzswngh cazvuhlungz couh dangq guh 7 faen cung diuqcag, genhciz gwn bi ndeu ndaej gemjbiz 2 goenggaen doxhwnj.

Singj da raeh da gwn cazvagut. Seizhah aenvih mbwn aeng, yungzheih yingjyangj bouxvunz haeujninz, ngoenz daihngeih vunz baenz gvaengzda foeggawh. Ndaej yungh faiq yub raemx cazvagut led seiqhenz gvaengzda, giz foeggawh gig vaiq couh ndaej siucawz bae. Vagut ndaej yw lwgda naetnaiq, caemh ndaej yw da myox.

Meijyungz hoh naengnoh gwn cazva. Yingzyangj conhgyah nyinhnaeuz, ciengz aeu va ndip cimq raemxgoenj gwn, ndaej diuzcez sinzgingh, coicaenh sup haeuj caeuq baiz ok, daezsang aenndang rengz dingj bingh. Haujlai va ndip ndaej siucawz caeuz gwnz naj, hanhhaed baezdoeg gwnz naj, doiceiz naengnoh nyieglaux.

Mbouj doengz cazva miz mbouj doengz goengyauq, lumj cazmeizgveiq ndaej gemjbiz, caemh ndaej gyangq hezyaz; goyouzcoeng ndaej siu huj cawz dokraemx; goswjlozlanz ndaej baujhoh cihgi’gvanj, hab boux ciengz cit ien gwn.