Yawhfuengz lwgnyez seizhah baenzbingh, gvanhgen dwg demgiengz rengz dingj bingh lwgnyez. Bingzseiz, aeu lai hawj lwgnyez camgya guh di lienhndang he; cawjranz haeujsim baujhoh dungx lwgnyez, gaej hawj lwgnyez gwn gij doxgaiq youznywnx caeuq gij huq yungzheih dungxraeng haenx, gwnndoet aeu doxdaengh; hawj lwgnyez ninz gaeuq. Cawz gijneix le, lij aeu haeujsim baihlaj geij diemj dem:

1、Cawjranz aeu ciengzseiz haeujsim hoengheiq vaendoh caeuq mbaeqdoh, ndaw ranz ndaw rug vaendoh aeu gamhanh youq 25 daengz 30 doh dauqndaw, mbaeqdoh baujciz youq 50% hwnjroengz.

2、Lwgnyez daenj buhvaq aeu soeng, aeu hawj de daenj gij buhvaq baengz unq、doeng heiq ndei、sup cumx ak haenx; baengznyouh aeu yungh baengzfaiq; gaej hawj lwgnyez bae laj ndithaenq guhcaemz.

3 Lai hawj lwgnyez gwn raemx, lwgnding gueng song baez cij cungqgyang aeu hawj de gwn baez raemx ndeu; seizhah lwgnyez maij gwn yinjliu gyoet, cawjranz aeu senj gij yinjliu naengz siu hwngq、yingzyangj gyaciz sang haenx hawj lwgnyez gwn, lumj binghgizlinz、cijvaiz soemj、raemxmak daengj.

4、Gij lwgnyez seizhah baenzbingh youqgaenj haenx, ndaej youq canghyw cijdauj lajde gwn di yw he, lumj yanghsah luzginhvanz(香沙六君丸)、luzvei divangzvanz（六味地黄丸） daengj.