Sai:Soengq nuengx ok baema,

Beix raemxda hix gyienx;

Song vunz boux youq mbiengj,

Saed nanz siengj ndaej lumz.

Mbwk：Beix soengq nuengx baema,

Mwngz raemxda gaej gyienx;

Raeuz caez naemj caemh siengj,

Song mbiengj sim doxlienz.

Sai: Doxbiek boux youq mbiengj,

Beix caen siengj mwngz lai,

Muengh mwngz dahnuengx gvai;

Gaej baenzvaiq baema.

Mbwk： Nuengx cek beix baema,

Ranz miz naz youh reih;

Baenzvunz daeuj dangseiq,

Hix geiq dwg guhhong.

Sai:Bouxvunz dang beksingq,

Hong itdingh dwg meiz(miz);

Cungj ndaej vangq saekseiz,

Hongnyaq ndei cix daeuj.

Mbwk：Gangj hwnj raeuz nyaenx ngamj,

Saed dangq song gvanbaz;

Lumj doengz doiq roegga,

Lawzlawz ra guhdoih.

Sai:Caen dwg ndaej yienghneix,

Nuengx cix gyaez baema;

Sohsoh byaij daengz gya,

Gaej hawj ca(ci) loeng loh.

Mbwk： Beix doxdauq baema,

Gaej youh va linghduenh;

Coenzvah dwk faen duenx,

Raeuz laeg cuenq sim vunz.

Caez: Beix nuengx mwngz ndei

byaij,

Caez cuenq naj baema;

Cou guh sat reihnaz,

Menh daeuj ra guhdoih.